അടിമാലി : കൊച്ചി- ധനുഷ്‌ക്കോടി ദേശീയപാതയില്‍ വലിയ മരം കടപുഴകി വീണു. ഇതേത്തുടര്‍ന്ന് ദേശീയപാതയില്‍ അര മണികൂര്‍ ഗതാഗതം തടസപ്പെട്ടു. ആളപായമില്ല. ഇന്നലെ ഉച്ചകഴിഞ്ഞ് മൂന്നു മണിയോടെയായിരുന്നു സംഭവം. നേര്യമംഗലത്തിന് സമീപം ചാക്കോച്ചി വളവിനടുത്താണ് മരം വീണത്. ഈ സമയം റോഡില്‍ വാഹനങ്ങള്‍ ഉണ്ടായിരുന്നില്ല. ഇതിനാല്‍ വലിയ അപകടം ഒഴിവായി. കോതമംഗലത്തുനിന്നും എത്തിയ ഫയര്‍ ഫോഴ്‌സും നാട്ടുകാരും ചേര്‍ന്ന് മരം വെട്ടി മാറ്റിയാണ് ഗതാഗതം സാധാരണ നിലയിലാക്കിയത്. വേനല്‍ കടുത്തതോടെ മരങ്ങള്‍ കൂടുതലും ഉണങ്ങി നില്‍ക്കുന്നു. ഏതുസമയവും വീഴാന്‍ പാകത്തിന് ഇനിയും മരങ്ങളുണ്ട്. വീതി വളരെ കുറവുള്ള പ്രദേശമാണിത്. ചെറു വാഹനങ്ങള്‍ പോലും കടന്ന് പോകുവാന്‍ കഴിയാത്ത വിധത്തിലാണ് മരം വീണത്.