ബംഗളൂരു: ഇന്ത്യന്‍ കോച്ചിനെ സംബന്ധിച്ച വിവാദത്തില്‍ കഴമ്പില്ലെന്ന് അനില്‍ കുംബ്ലെ. രവി ശാസ്ത്രിയോ താനോ കോച്ച് എന്നുള്ളതിലല്ല കാര്യം. കളിക്കാരാണ് ഏറ്റവും പ്രധാനപ്പെട്ടത്. എല്ലായ്‌പ്പോഴും കളിക്കാരെ മികവിലേക്കെത്തിക്കലാണ് മുഖ്യം.

അതിനു പിന്തുണ നല്‍കുക എന്നുള്ള കടമ മാത്രമാണ് പിന്നണിയിലുള്ളവര്‍ക്കുള്ളതെന്ന് കുംബ്ലെ മാധ്യമ പ്രവര്‍ത്തകരോട് പറഞ്ഞു. ഇന്ത്യന്‍ കോച്ചായ ശേഷമുള്ള ആദ്യത്തെ പ്രസ് മീറ്റില്‍ സംസാരിക്കുകയായിരുന്നു അദ്ദേഹം.

ടീം ഡയറക്ടറായി രവി ശാസ്ത്രി മികച്ച പ്രവര്‍ത്തനങ്ങളാണ് നടത്തിയത്. ഇന്ന് അക്കാര്യങ്ങളൊക്കെ താന്‍ നോക്കുന്നു. നാളെ മറ്റൊരാളാവാം. ആരൊക്കെ മാറിയാലും ടീമംഗങ്ങള്‍ക്കാണ് പ്രാധാന്യം നല്‍കേണ്ടത്. കോച്ചായ ശേഷം ശാസ്ത്രിയെ വിളിച്ചിരുന്നു. അദ്ദേഹം തന്നെ അഭിനന്ദിക്കുകയും ചെയ്‌തെന്ന് കുംബ്ലെ കൂട്ടിച്ചേര്‍ത്തു.