കൊല്‍ക്കത്ത: രവി ശാസ്ത്രിയുടെ വിമര്‍ശനത്തിന് സൗരവ് ഗാംഗുലിയുടെ മറുപടി. ശാസ്ത്രി ഇന്ത്യന്‍ ടീമിന്റെ പരിശീലക സ്ഥാനത്ത് എത്താതിരിക്കാന്‍ കാരണം താനാണെന്ന് വിചാരിക്കുന്നുണ്ടെങ്കില്‍ അദ്ദേഹം വിഢ്ഡികളുടെ ലോകത്താണ് ജീവിക്കുന്നതെന്ന് കരുതേണ്ടി വരുമെന്ന് ഗാംഗുലി പറഞ്ഞു. കോച്ചിങ് സ്ഥാനം സംബന്ധിച്ചു ശാസ്ത്രിയുടെ വിവാദ പ്രസ്താവനകള്‍ക്ക് രോഷത്തോടെയാണ് ഗാംഗുലി പ്രതികരിച്ചത്.

ശാസ്ത്രിയുടെ പ്രസ്താവനകള്‍ വ്യക്തിപരമാണെന്നാണ് കരുതുന്നത്. അദ്ദേഹത്തോട് നേരിട്ട് അഭിമുഖത്തില്‍ പങ്കെടുക്കാന്‍ നിര്‍ദേശിച്ചു. പക്ഷേ ബാങ്കോക്കില്‍ ഇരുന്നുകൊണ്ടാണ് ശാസ്ത്രി അഭിമുഖത്തില്‍ പങ്കെടുത്തത്. അഭിമുഖം നടത്തുന്ന കമ്മിറ്റി മുമ്പാകെയാണ് ശാസ്ത്രി വരേണ്ടിയിരുന്നത്. എന്നിട്ടും അദ്ദേഹത്തിനെതിരേ ആരും കയര്‍ത്തു സംസാരിച്ചിട്ടില്ല. പിന്നെന്തു കൊണ്ടാണ് തനിക്കെതിരേ അദ്ദേഹം തിരിഞ്ഞതെന്ന് വ്യക്തമല്ല. ശാസ്ത്രിയുടെ വ്യക്തിപരമായ പരാമര്‍ശങ്ങള്‍ തന്നെ വേദനിപ്പിച്ചു. അതില്‍ ദുഃഖിതനുമാണ്.

കഴിഞ്ഞ 20 വര്‍ഷത്തോളം ബി.സി.സി.ഐ കമ്മിറ്റികളുടെ ഭാഗമാണ് ശാസ്ത്രി. അദ്ദേഹത്തിനറിയാം എങ്ങനെയാണ് കമ്മിറ്റി പ്രവര്‍ത്തിക്കുന്നതെന്ന്. എന്നിട്ടും വിമര്‍ശിച്ചത് ശരിയായില്ല. ഇത്തരം ജോലി ഏറ്റെടുക്കുന്നതിന് മുന്‍പ് അതിനെ ഗൗരവത്തോടെ സമീപിക്കണമെന്നും ഗാംഗുലി കൂട്ടിച്ചേര്‍ത്തു.