കളമശേരി: എറണാകുളം ഗവണ്‍മെന്റ് മെഡിക്കല്‍ കോളജ് വിദ്യാര്‍ഥിനിയായിരുന്നു ഷംന തസ്‌നീം ചികിത്സ പിഴവിനെ  തുടര്‍ന്ന് മരിച്ച സംഭവത്തില്‍ അന്വേഷണം ഇതേ വരെ പൂര്‍ത്തിയായിട്ടില്ല. ഷംന 2016 ജൂലൈ 18നാണ് മെഡിക്കല്‍ കോളജില്‍ ചികിത്സയിലിരിക്കെ മരിച്ചത്.
ആവശ്യമായ ചികിത്സ കൃത്യ സമയത്ത് കിട്ടാതിരുന്നതിനെ തുടര്‍ന്നായിരുന്നു മരണമെന്നാണാരോപണം. അതേ പോലെ മരിച്ചിട്ടും  മറ്റൊരു സ്വകാര്യ ആശുപത്രിയിലെത്തിച്ച് ചികിത്സിച്ചുവെന്ന് റിപ്പോര്‍ട്ടുണ്ടാക്കിയതിനെ കുറിച്ചും അന്വേഷണം നടത്തി നടപടി വേണമെന്നാണ് ഷംനയുടെ പിതാവിന്റെ ആവശ്യം.
ഈ ആവശ്യവുമായി അദ്ദേഹം ഇപ്പോഴും  അധികാര  കേന്ദ്രങ്ങളില്‍ അലയുകയാണ്. എന്നാല്‍ അന്വേഷണം നടത്തി കുറ്റക്കാര്‍ക്കെതിരെ നടപടിയെടുക്കാന്‍ ഇതുവരെ സര്‍ക്കാരും മെഡിക്കല്‍ കോളജ് അധിക്യതരും തയ്യാറായിട്ടില്ല. ഇതിനിടെയാണ് ജെറിയുടെ മരണം വിവാദമായിരിക്കുന്നത്.