കട്ടപ്പന: വേനല്‍ ശക്തമായി ഏലച്ചെടികള്‍ കരിഞ്ഞുണങ്ങാന്‍ തുടങ്ങിയതോടെ കര്‍ഷകര്‍ പ്രതിസന്ധിയില്‍. ഏലത്തോട്ടങ്ങളില്‍ പണി നിര്‍ത്തിവച്ചതോടെ തൊഴിലാളികള്‍ പട്ടിണിയിലാകുന്ന സ്ഥിതിയുമായി. വിളവെടുപ്പ് സീസണ്‍ കഴിഞ്ഞതോടെ ഭൂരിഭാഗം തോട്ടങ്ങളിലും പണികള്‍ നിര്‍ത്തിവച്ചിരിക്കുകയാണ്. സ്ഥിരം തൊഴിലാളികളായ ചിലരെ ഉപയോഗിച്ച് ഏലച്ചെടികള്‍ നയ്ക്കുന്ന ജോലി മാത്രമാണ് ഇപ്പോള്‍ നടക്കുന്നത്.
ഇത്തരം സാഹചര്യങ്ങളില്‍ ചെറുകിട കര്‍ഷകരുടെ കൃഷിയിടങ്ങളില്‍ ജോലി ചെയ്താണ് മുന്‍ കാലങ്ങളില്‍ തൊഴിലാളികള്‍ ജീവിതം തള്ളി നീക്കിയിരുന്നത്. എന്നാല്‍ കാര്‍ഷിക വിളകള്‍ക്കെല്ലാം വന്‍ വിലയിടിവ് ഉണ്ടായതോടെ ചെറുകിട കര്‍ഷകരും ജോലി ചെയ്യാന്‍ തൊഴിലാളികളെ വിളിക്കാത്ത സാഹചര്യമാണ്. ആകെയുള്ള ഭൂമിയിലെ ഏലച്ചെടികളില്‍ നിന്നു ലഭിക്കുന്ന ഏലക്കായയില്‍ പ്രതീക്ഷയര്‍പ്പിച്ചിരുന്ന തൊഴിലാളികള്‍ക്കും ചെറുകിട കര്‍ഷകര്‍ക്കും വിലത്തകര്‍ച്ച വന്‍ തിരിച്ചടിയാണ് നല്‍കിയിരിക്കുന്നത്. ഈ സീസണില്‍ മറ്റിടങ്ങളില്‍ കൂലിപ്പണിക്കുപോയി വരുമാനം കണ്ടെത്തേണ്ട ഗതികേടിലായിരുന്നു ചെറുകിട കര്‍ഷകരും. നിലവില്‍ 450 മുതല്‍ 600 രൂപ വരെയാണ് ഏലക്കായയ്ക്ക് വില ലഭിക്കുന്നത്. ഒരു കിലോഗ്രാം ഏലക്കായ ഉല്‍പാദിപ്പിക്കാന്‍ ശരാശരി 800 രൂപയോളം ചെലവ് വരുന്ന സാഹചര്യമുള്ളപ്പോഴാണിത്.
തൊഴിലാളികളുടെ കൂലി വര്‍ധനയും കീടനാശിനികളുടേയും വളങ്ങളുടേയും വില കൂടിയതും കര്‍ഷകരെ കടക്കെണിയിലേക്ക് തള്ളിവിട്ടു. ഹൈറേഞ്ചിലെ ഭൂരിഭാഗം കര്‍ഷകരും ഏലത്തെ ആശ്രയിച്ചാണ് ജീവിതം നയിച്ചിരുന്നത്.
ഇതിനാല്‍ ഏലം വിലയിടിവ് ദൈനംദിന ജീവിതത്തെ തകിടം മറിച്ചിരിക്കുകയാണ്. ചെറുകിട കര്‍ഷകരുടെയെല്ലാം ഏലച്ചെടികള്‍ കരിഞ്ഞുണങ്ങി വീഴുകയാണ്. കുടിവെള്ളത്തിനുപോലും ബുദ്ധിമുട്ട് അനുഭവപ്പെടുന്നതിനാല്‍ ഏലച്ചെടികള്‍ നയ്ക്കാന്‍ കഴിയാത്ത സ്ഥിതിയാണ്.