വിശാഖപട്ടണം: ദേവ്ധര്‍ ട്രോഫി ഏകദിന പോരാട്ടത്തില്‍ ഇന്ത്യ ബി ടീമിനു തുടര്‍ച്ചയായ രണ്ടാം വിജയം. തമിഴ്‌നാടിനെ 32 റണ്‍സിനു കീഴടക്കിയാണു ബി ടീം വിജയിച്ചത്. ആദ്യം ബാറ്റു ചെയ്ത ഇന്ത്യ ബി ടീം നിശ്ചിത 50 ഓവറില്‍ എട്ടു വിക്കറ്റ് നഷ്ടത്തില്‍ 316 റണ്‍സെടുത്തപ്പോള്‍ തമിഴ്‌നാടിന്റെ പോരാട്ടം 48.4 ഓവറില്‍ 284 റണ്‍സില്‍ അവസാനിച്ചു.
തമിഴ്‌നാടിനായി കൗശിക് ഗാന്ധി (124) സെഞ്ച്വറിയും നാരയണ്‍ ജഗദീശന്‍ അര്‍ധ സെഞ്ച്വറി (64)യും നേടി. എന്നാല്‍ വാലറ്റം കൂട്ടത്തകര്‍ച്ച നേരിട്ടതു അവര്‍ക്കു തിരിച്ചടിയായി. ബി ടീമിനായി ധവാല്‍ കുല്‍ക്കര്‍ണി, അക്‌സര്‍ പട്ടേല്‍ എന്നിവര്‍ മൂന്നു വീതം വിക്കറ്റുകള്‍ വീഴ്ത്തി.
നേരത്തെ മനീഷ് പാണ്ഡെ (104) നേടിയ സെഞ്ച്വറിയുടെ കരുത്തിലാണ് ബി ടീം രണ്ടാം മത്സരത്തില്‍ സ്‌കോര്‍ 300 കടത്തിയത്. ശിഖര്‍ ധവാന്‍ (50), അക്‌സര്‍ പട്ടേല്‍ (51) എന്നിവരുടെ അര്‍ധ ശതകങ്ങളും വാലറ്റത്തെ ബാറ്റ്‌സ്മാന്‍മാരുടെ വമ്പനടികളും മികച്ച സ്‌കോറിലേക്കു അവരെ നയിച്ചു. തമിഴ്‌നാടിനായി സായി കിഷോര്‍ നാലു വിക്കറ്റുകള്‍ വീഴ്ത്തി.