ന്യൂഡല്‍ഹി: എ.കെ ശശീന്ദ്രന്‍ രാജിവച്ചൊഴിഞ്ഞ ഒഴിവിലേക്ക് വീണ്ടും എന്‍.സി.പിക്ക് മന്ത്രി സ്ഥാനം നല്‍കുന്നതില്‍ സി.പി.എം കേന്ദ്ര നേതൃത്വത്തിന് അതൃപ്തി. ഗോവയില്‍ എന്‍.സി.പി ബി.ജെ.പിയെ പിന്തുണച്ചതാണ് കേന്ദ്ര നേതൃത്വത്തിന്റെ അതൃപ്തിക്ക് കാരണം.

പുതിയ മന്ത്രിസ്ഥാനത്തേക്ക് എന്‍.സി.പിയുടെ എം.എല്‍.എ തോമസ് ചാണ്ടിയുടെ പേര് ഉയര്‍ന്നു കേള്‍ക്കുന്നതിനിടെയാണ് സി.പി.എം കേന്ദ്രനേതൃത്വം എതിര്‍പ്പറിയിച്ച് രംഗത്തെത്തിയത്. ഇക്കാര്യത്തിലുള്ള എതിര്‍പ്പ് നേരത്തെ എന്‍.സി.പി ദേശീയ അധ്യക്ഷന്‍ ശരദ് പവാറിനെ അറിയിച്ചതാണെന്നും കേന്ദ്രനേതൃത്വം പറയുന്നു.

വിഷയത്തില്‍ സി.പി.എം കേന്ദ്ര നേതാക്കള്‍ കൂടിയാലോചന നടത്തും. ബി.ജെ.പിയുമായുള്ള എന്‍.സി.പിയുടെ നിലപാട് വ്യക്തമാക്കണമെന്നാണ് സി.പി.എമ്മിന്റെ ആവശ്യം. എന്‍.സി.പിയാണ് പുതിയ മന്ത്രിയെക്കുറിച്ച് തീരുമാനിക്കേണ്ടതെന്ന് ഇന്നു രാവിലെ സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍ പറഞ്ഞിരുന്നു.