ന്യൂഡല്‍ഹി: ഉത്തര്‍പ്രദേശിലെ കൈരാനയടക്കം നാല് ലോക്‌സഭ മണ്ഡലങ്ങളിലേക്കും 10 നിയമസഭ മണ്ഡലങ്ങളിലേക്കുമുള്ള ഉപതെരഞ്ഞെടുപ്പ് ഇന്ന് നടക്കും. കനത്ത സുരക്ഷയാണ് തെരഞ്ഞെടുപ്പിനോട് അനുബന്ധിച്ച് ഒരുക്കിയിട്ടുള്ളത്. കര്‍ണാടക നിയമസഭ തെരഞ്ഞെടുപ്പിന്റെ പശ്ചാത്തലത്തില്‍ ബി.ജെ.പിക്കും കോണ്‍ഗ്രസിനും നിര്‍ണായകമാണ് ഈ തെരഞ്ഞെടുപ്പ്. പലയിടത്തും ബി.ജെ.പിക്ക് എതിരെ വിശാല പ്രതിപക്ഷമാണ് മത്സരിക്കുന്നത്.

ഉത്തര്‍പ്രദേശിലെ കൈരാന, മഹാരാഷ്ട്രയിലെ പല്‍ഘാര്‍, ബന്ദാരഗോണ്ഡിയ, നാഗാലാന്‍ഡിലെ തേരെ എന്നീ ലോക്‌സഭാ മണ്ഡലങ്ങളിലാണ് ഉപതെരഞ്ഞെടുപ്പ് നടക്കുന്നത്. വിവിപാറ്റ് ഘടിപ്പിച്ച മെഷീനിലാണ് വോട്ട് രേഖപ്പെടുത്തുക.

കൈരാനയില്‍ ബി.ജെ.പിക്ക് എതിരെ മത്സരിക്കുന്ന ആര്‍.എല്‍.ഡിക്ക് എസ്.പി, ബി.എസ്.പി, കോണ്‍ഗ്രസ് പാര്‍ട്ടികള്‍ പിന്തുണ പ്രഖ്യാപിച്ചിട്ടുണ്ട്. മഹാരാഷ്ട്രയിലെ പല്‍ഘാര്‍ മണ്ഡലത്തില്‍ ബി.ജെ.പിയും ശിവസേനയും കോണ്‍ഗ്രസും തമ്മിലുള്ള ത്രികോണ മത്സരം നടക്കും. ബന്ദാര ഗോണ്ഡിയ മണ്ഡലത്തില്‍ ബി.ജെ.പിയും കോണ്‍ഗ്രസ് പിന്തുണയുള്ള എന്‍.സി.പിയും തമ്മിലാണ് മത്സരം. നാഗാലാന്‍ഡിലെ തേരെ മണ്ഡലത്തില്‍ എന്‍.ഡി.പി.പിയും എന്‍.പി.എഫും ഏറ്റുമുട്ടും. !

യുപയിലെ നൂര്‍പൂര്‍ ഉള്‍പ്പടെ 10 നിയമസഭാ മണ്ഡലങ്ങളിലും തെരഞ്ഞെടുപ്പ് നടക്കുന്നുണ്ട്. നൂര്‍പൂറില്‍ എസ്.പിയും ബി.ജെ.പിയും തമ്മിലാണ് പോരാട്ടം. മഹാരാഷ്ട്രയിലെ പലൂസ് കടെഗ്വാന്‍ മണ്ഡലത്തില്‍ കോണ്‍ഗ്രസിന് എതിരില്ല. കേരളത്തിലെ ചെങ്ങന്നൂരിലും ഇന്നാണ് തെരഞ്ഞെടുപ്പ്.