പനമരം: അരിവാള്‍ കൊക്കിന്റെ കേരളത്തിലെ ഏക പ്രജനന കേന്ദ്രമായ പനമരം കൊറ്റില്ലത്തിന്റെ സംരക്ഷണത്തിന് സാധ്യത തെളിയുന്നു. പനമരം ഗ്രാമപ്പഞ്ചായത്ത് 2017-18 ലെ ബജറ്റില്‍ തുക വകയിരുത്തിയതാണ് കൊറ്റില്ലത്തിന്റെ കാര്യക്ഷമവും ശാസ്ത്രീയവുമായ സംരക്ഷണത്തിന് കളമൊരുക്കുന്നത്. പരിസ്ഥിതി രംഗത്തുള്ളവരുടെയടക്കം അഭിപ്രായം തേടി കൊറ്റില്ലം സംരക്ഷണ പദ്ധതി പ്രാവര്‍ത്തികമാക്കാനാണ് ആലോചനയെന്ന് പനമരം പഞ്ചായത്ത് പ്രസിഡന്റ് ലിസി തോമസ് പറഞ്ഞു. കൊറ്റില്ലവും പരിസരവും പരിസ്ഥിതി സൗഹൃദ വിനോദസഞ്ചാര കേന്ദ്രമായി വികസിപ്പിക്കാനും പദ്ധതിയുണ്ട്.
മലബാറിലെ പ്രധാനപ്പെട്ട കൊറ്റില്ലങ്ങളില്‍ ഒന്നാണ് പനമരത്തേത്. പുഴക്ക് നടുവില്‍ പ്രകൃതി രൂപപ്പെടുത്തിയ ഒരു ഏക്കറോളം വരുന്ന രണ്ട് തുരുത്തുകളാണ് പക്ഷികളുടെ താവളം. അരിവാള്‍ക്കൊക്കന്‍, പാതിരാക്കൊക്ക്, കാലിക്കൊക്ക്, കുളക്കൊക്ക്, ഇടക്കൊക്ക്, ചാരക്കൊക്ക്, വലിയ വെള്ളരിക്കൊക്ക്, ചെറുമുണ്ടി, നീര്‍ക്കാക്ക തുടങ്ങിയവയാണ് തുരുത്തിലെ പതിവ് അതിഥികള്‍. എല്ലാ വര്‍ഷവും മെയ് അവസാനത്തോടെ എത്തുന്ന ഇവ കൂടൊരുക്കി വംശവര്‍ധന നടത്തി ഒക്‌ടോബര്‍ അവസാനത്തോടെയാണ് മടങ്ങുന്നത്.
ഏതാനും വര്‍ഷങ്ങളായി കൊറ്റില്ലത്തില്‍ എത്തുന്ന ദേശാടനക്കിളികളുടെ എണ്ണം കുറയുകയാണ്. അഞ്ച് വര്‍ഷം മുമ്പത്തേതിനെ അപേക്ഷിച്ച് കഴിഞ്ഞ സീസണില്‍ എത്തിയ പക്ഷികളുടെ എണ്ണത്തില്‍ 25 ശതമാനത്തോളം കുറവാണ് പക്ഷി നിരീക്ഷകരും പരിസ്ഥിതി പ്രവര്‍ത്തകരും കണക്കാക്കിയത്. ചാരക്കൊക്ക്, ഇടക്കൊക്ക്, അരിവാള്‍ക്കൊക്കന്‍, വലിയ വെള്ളരിക്കൊക്ക് എന്നിവയുടെ എണ്ണത്തിലാണ് കാര്യമായ കുറവുണ്ടായത്.
പനമരം പുഴയോരത്തും കൊറ്റില്ലം സ്ഥിതിചെയ്യുന്ന തുരുത്തിലുമുള്ള മുളങ്കൂട്ടങ്ങള്‍ ഉണങ്ങി നശിച്ചതോടെയാണ് ദേശാടനകിളികളുടെ എണ്ണം കുറഞ്ഞതെന്ന് പരിസ്ഥിതി പ്രവര്‍ത്തകര്‍ പറയുന്നു. പാരിസ്ഥിതിക പ്രാധാന്യം ഏറെയുള്ള പനമരം കൊറ്റില്ലത്തിന്റെ സംരക്ഷണത്തില്‍ കാര്യമായ നടപടികളെടുത്തിരുന്നില്ല. കാരാപ്പുഴ, വള്ളിയൂര്‍കാവ്, ആറാട്ടുതറ, കോട്ടത്തറ, പനമരം തുടങ്ങിയ ഇടങ്ങളിലായിലായി ചെറുതും വലുതുമായ 15 കൊറ്റില്ലങ്ങളാണ് 1980കളില്‍ വയനാട്ടില്‍ ഉണ്ടായിരുന്നത്. നിലവില്‍ പനമരത്തും കോട്ടത്തറയിലും മാത്രമാണ് കൊറ്റില്ലങ്ങള്‍.