കൈപ്പമംഗലം: കനത്ത കാറ്റില്‍ കയ്പമംഗലം ബീച്ചില്‍ മത്സ്യത്തൊഴിലാളിയുടെ വീട് തകര്‍ന്നു. വഞ്ചിപ്പുര ബീച്ച് തെക്ക് തെക്കിനിയേടത്ത് ഓമനന്റ ഓടു മേഞ്ഞ വീടാണ് കാറ്റില്‍ പൂര്‍ണമായും തകര്‍ന്നത്. ഞായറാഴ്ച്ച ഉച്ചയ്ക്ക് ഒന്നരയോടെയാണ് സംഭവം. ഓമനന്‍ വീട്ടിനകത്ത് ടി.വി കണ്ടുകൊണ്ടിരിക്കെയാണ് വീട് തകര്‍ന്ന് വീണത്. ഓടും, ഫാനും ദേഹത്ത് വീണ് ഓമനന്റെ കാലിനും തോളിനും പരുക്കേറ്റിട്ടുണ്ട്. വീട്ടുപകരണകള്‍ തകര്‍ന്നിട്ടുണ്ട്.
പഞ്ചായത്ത്, വില്ലേജ് അധികൃതര്‍ സ്ഥലത്തെത്തി. മതിലകം പഞ്ചായത്തില്‍ പാപ്പിനിവട്ടം താലം റോഡ് മേഖലയില്‍ ഇടിമിന്നലില്‍ വ്യാപകമായി നാശനഷ്ടം സംഭവിച്ചു. വെള്ളൂപ്പറമ്പില്‍ അഭിലാഷിന്റെ വീട്ടിലെ സ്വച്ച് ബോഡുകള്‍ കത്തുകയും അഭിലാഷിന്റെ ഭാര്യ മായാദേവിക്ക് വൈദ്യുത ആഘാതം എല്‍ക്കുകയും ചെയ്തു. സമീപത്തെ മാടത്തിങ്കള്‍ ജോഷിയുടെ മകന്‍ ഷിബു(23)വിനും വൈദ്യുതി ആഘാതമേറ്റു. മണ്ടത്ര ശശി മാസ്റ്ററുടെ വീട്ടിലെ ഇന്‍വെര്‍ട്ടര്‍, ഫാന്‍ ഉള്‍പ്പെടെയുള്ളവ മിന്നലില്‍ കത്തി നശിച്ചു.