തൃശൂര്‍: തൊഴിലാളികളുടെ പൂര്‍ണ ഉടമസ്ഥതയിലും നേതൃത്വത്തിലും മഹാനായ എ.കെ.ജി തൊഴിലാളിവര്‍ഗത്തിനും രാജ്യത്തിനും മാതൃകയായ രീതിയില്‍ സ്ഥാപിച്ച  ഇന്ത്യന്‍ കോഫീ ഹൗസിനെ തകര്‍ക്കാനുള്ള സി.പി.എമ്മിന്റെയും ഇടതുപക്ഷ സര്‍ക്കാരിന്റെയും കുടിലതന്ത്രത്തെ എന്തുവിലകൊടുത്തും ചെറുത്തുതോല്‍പ്പിക്കണമെന്ന് മുസ്‌ലിംലീഗ് ജില്ലാ പ്രസിഡന്റ് സി.എച്ച് റഷീദ് ആവശ്യപ്പെട്ടു. നിലവിലെ ഭരണസമിതി കാലാവധി കഴിയും മുന്‍പേ പിരിട്ടുവിട്ട് അഡ്മിനിസ്‌ട്രേറ്റര്‍ ഭരണം നടത്താനുള്ള സര്‍ക്കാര്‍ നീക്കത്തിനെതിരെ ഇന്ത്യന്‍ കോഫീ ഹൗസ് വര്‍ക്കേഴ്‌സ് എംപ്‌ളോയീസ് യൂണിയന്‍ നടത്തുന്ന സമരത്തിന് ഐക്യദാര്‍ഡ്യം പ്രഖ്യാപിച്ച് സമരപന്തലിലെത്തി സംസാരിക്കുകയായിരുന്നു അദ്ദേഹം.
ജനാധപത്യ രീതിയില്‍ അധികാരമേറ്റ സഹകരണ സംഘങ്ങളെ ഭരണസ്വാധീനവും പൊലിസിനെയും ഉപയോഗപ്പെടുത്തി പിടിച്ചെടുക്കാനുള്ള നീക്കത്തിനെതിരെ ജനാധിപത്യ ശക്തികളുടെ പൂര്‍ണമായ പിന്തുണ ഉണ്ടാകുമെന്ന് സി.എച്ച് റഷീദ് പറഞ്ഞു. മഹാഭൂരിപക്ഷം വരുന്ന തൊഴിലാളികളുടെ പിന്തുണയുള്ള കോഫീഹൗസിനെ തകര്‍ക്കുക വഴി എ.കെ.ജി സ്വപ്നം കണ്ട തൊഴിലാളികളുടെ ഉടമസ്ഥതയിലുള്ള ഇന്ത്യന്‍ കോഫീ ഹൗസിനെ തകര്‍ക്കുകയാണ് സി.പി.എം ചെയ്യുന്നത്. രാജ്യത്തിന് തന്നെ മാതൃകയായ രീതിയില്‍ കേരളത്തിലും ഇതര സംസ്ഥാനങ്ങളിലും പൂര്‍ണമായും തൊഴിലാളികളുടെ ഉടമസ്ഥതയില്‍ പ്രവര്‍ത്തിക്കുന്ന ഈ മാതൃകാ സ്ഥാപനത്തെ തകര്‍ക്കാന്‍ എന്തു ഹീനപ്രവര്‍ത്തിയും ചെയ്യാന്‍ മടയില്ലെന്നാണ് സമീപകാല സി.പി.എം പ്രവര്‍ത്തികള്‍ ചൂണ്ടിക്കാട്ടുന്നത്. എന്നാല്‍ ഇതിനെതിരെ ജനാധിപത്യശക്തികളുടെയും തൊഴിലാളികളുടെയും ശക്തമായ പ്രതിഷേധനിര ഉയര്‍ന്നുവന്നിട്ടുള്ളത് മാതൃകാപരമാണ്. വിജയംവരെയുള്ള ഈ ഒരുമിച്ചുള്ള പോരാട്ടത്തിന് എല്ലാവിധ പിന്തുണയും നല്‍കുമെന്നും സി.എച്ച് റഷീദ് വ്യക്തമാക്കി. മുസ്‌ലിംലീഗ് ജില്ലാ സെക്രട്ടറി എം.എ റഷീദ്, പ്രവാസി ലീഗ് ജില്ലാ പ്രസിഡന്റ് സി.കെ അഷറഫലി, കര്‍ഷക സംഘം ജില്ലാ പ്രസിഡന്റ് സി. അബ്ദുദ്ദി ഹാജി, മുസ്‌ലിംലീഗ് മണ്ഡലം ജനറല്‍ സെക്രട്ടറി സി. സുല്‍ത്താന്‍ ബാബു, വൈസ് പ്രസിഡന്റ് സക്കരിയ പള്ളത്തേടത്ത്, ടി.എ അന്‍വര്‍, കെ.എ റസാഖ്, ബഷീര്‍ കൂര്‍ക്കഞ്ചേരി, കെ.എ നവാബ്, നൗഷാദ് അഹമ്മദ് എന്നിവരും ഒപ്പമുണ്ടായിരുന്നു.