ന്യൂയോര്‍ക്ക്: ഭാവിയുടെ സുവര്‍ണലോകം വായനക്കാര്‍ക്ക് സമ്മാനിച്ച വിഖ്യാത അമേരിക്കന്‍ എഴുത്തുകാരന്‍ ആല്‍വിന്‍ ടോഫ്‌ളര്‍ അന്തരിച്ചു. 87 വയസായിരുന്നു. ലോസ് ആഞ്ചല്‍സിലെ സ്വവസതിയിലായിരുന്നു അന്ത്യം. വ്യാവസായിക വിപ്ലവാനന്തര യുഗത്തിന്റെ ആചാര്യന്‍ എന്നറിയപ്പെടുന്ന ഇദ്ദേഹത്തിന്റെ പ്രധാന കൃതി ഫ്യൂച്ചര്‍ ഷോക്ക് ആണ്. വ്യാവസായിക വിപ്ലവത്തിനു ശേഷം ലോകം കാണാന്‍ പോവുന്ന ഡിജിറ്റല്‍ വിപ്ലവത്തെക്കുറിച്ച് പ്രവചിച്ച എഴുത്തുകാരനായിട്ടാണ് ആല്‍വിന്‍ അറിയപ്പെടുന്നത്.

തൊള്ളായിരത്തി അറുപതുകളില്‍ തന്നെ ലോകത്തിന്റെ മാറ്റം അദ്ദേഹം മുന്നില്‍ കണ്ടിരുന്നു. വ്യാവസായിക തലത്തില്‍നിന്നു ലോകം വിവര സാങ്കേതികവിദ്യയിലേയ്ക്കും അതുവഴി വന്‍ ഉല്‍പ്പാദനത്തിലേക്കും നീങ്ങുന്നതു അദ്ദേഹം എഴുതിയിരുന്നെങ്കിലും ലോകം അദ്ദേഹത്തെ അംഗീകരിച്ചിരുന്നില്ല. വളരെ കുറച്ചു പേര്‍ മാത്രമാണ് അദ്ദേഹത്തിനു പിന്തുണയുമായി എത്തിയത്. 1965ല്‍ ഫ്യൂച്ചര്‍ ഷോക്ക് എന്ന സാങ്കേതികപദം അദ്ദേഹം തന്റെ അക്കാദമിക പ്രബന്ധത്തില്‍ ഉപയോഗിച്ചു. പിന്നീട് 1970ലാണ് അദ്ദേഹം ഇത് പുസ്തക രൂപത്തില്‍ പ്രസിദ്ധീകരിച്ചത്. തന്റെ പുസ്തക ശേഖരത്തില്‍ ഏറ്റവും കൂടുതല്‍ വിറ്റഴിക്കപ്പെട്ട കൃതിയും കൂടിയാണിത്.