തിരൂരങ്ങാടി: നന്നമ്പ്ര പഞ്ചായത്തിലെ പ്രധാന ജലസ്രോതസായ കുണ്ടൂര്‍ തോട് നവീകരണത്തിന്റെ സര്‍വേ നടപടികള്‍ ആരംഭിച്ചു. ഇന്നലെ കാലത്ത് പതിനൊന്ന് മണിയോടെ തിരൂരങ്ങാടി താലൂക്ക് സര്‍വേ വിഭാഗത്തിന്റെ നേതൃത്വത്തിലാണ് സര്‍വേ ആരംഭിച്ചത്. വെഞ്ചാലി മുക്കത്ത് നിന്നും സര്‍വേ ആരംഭിച്ചെങ്കിലും ഇത് കുണ്ടൂര്‍ തോടിന്റെ ശാഖാ തോട് മാത്രമാണെന്നും ഔദ്യോഗിക രേഖകള്‍പ്രകാരം കുണ്ടൂര്‍തോട് വെഞ്ചാലി തോട്ടില്‍ നിന്നുമാണ് ആരംഭിക്കുന്നതെന്നും കണ്ടെത്തി.
തോടിന് എട്ടുമുതല്‍ പതിനാല് വരെയാണ് വീതി. എന്നാല്‍ മിക്കയിടങ്ങളിലും  അഞ്ച് മീറ്ററില്‍ താഴെയാണ് വീതി. കൊടിഞ്ഞി റോഡില്‍ തോടിന്റെ സ്ഥലം ഉള്‍പ്പെട്ടതായി സര്‍വേയില്‍ തെളിഞ്ഞു.  കൈയേറ്റങ്ങള്‍ കണ്ടെത്തി ഒഴിപ്പിക്കുന്നതിന് ശക്തമായ നടപടി സ്വീകരിക്കുമെന്ന് ബന്ധപ്പെട്ടവര്‍ അറിയിച്ചു. തിരൂരങ്ങാടി താലൂക്ക് സര്‍വേ വിഭാഗം തലവന്‍ സലീമിന്റെ നേതൃത്വത്തിലുള്ള ഏഴംഗ സംഘമാണ് സര്‍വേക്കെത്തിയത്.  നന്നമ്പ്ര പഞ്ചായത്ത് പ്രസിഡന്റ് എം.പി മുഹമ്മദ് ഹസ്സന്‍, വൈസ് പ്രസിഡന്റ് കാവുങ്ങല്‍ ഫാത്തിമ, സ്റ്റാന്‍ഡിങ് കമ്മിറ്റി അധ്യക്ഷരായ തേറാമ്പില്‍ ആസ്യ, ഊര്‍പ്പായി സൈതലവി, പഞ്ചായത്തംഗങ്ങളായ പി ചന്ദ്രന്‍, കെ സൈതലവി, പനയത്തില്‍ മുസ്തഫ, എ.സി ഫൈസല്‍, വി.കെ ഷമീന, കെ.പി മറിയാമു, കെ കുഞ്ഞിമരക്കാര്‍, യു.എ റസാഖ്, ഹാരിസ് ചെറുപ്പാറ, ഷാഫി പയ്യോളി, ചി.എം.എച്ച് സലാം, ഷമീര്‍ പൊറ്റാണിക്കല്‍ എന്നിവറം കൂടെയുണ്ടായിരുന്നു.