തിരൂരങ്ങാടി: ബജറ്റിന്റെ കോപ്പി കൈയില്‍ കിട്ടിയ കൗണ്‍സിലര്‍മാര്‍ പരസ്പരം കണ്ണുമിഴിച്ചു നോക്കി.'ഇംഗ്ലിഷില്‍ അച്ചടിച്ച' ബജറ്റ്‌കോപ്പി ഏവരുടെയും കൈകളിലിരുന്നു വിറച്ചു.
 ലക്ഷങ്ങളുടെയും കോടികളുടെയും  കണക്കുകള്‍ നിരത്തിയിട്ടുണ്ടായിരുന്നെങ്കിലും ഒന്നും മനസ്സിലാവാതെ അവസാനം ബജറ്റ് കോപ്പി അവരവര്‍ സ്വന്തം ബാഗുകളിലേക്ക് തിരുകി. ഇന്നലെ നടന്ന തിരൂരങ്ങാടി മുനിസിപ്പാലിറ്റിയുടെ ബജറ്റ് അവതരണമാണ് ഏറെ വിചിത്രമായത്.കാലത്ത് 11 മണിയോടെയാണ് ബജറ്റ് അവതരണം ആരംഭിച്ചത്.  പദ്ധതികളും തുകയും രേഖപ്പെടുത്തിയ പാതിനാറ്  പേജ് വരുന്ന പുസ്തകത്തിലെ  260 ഓളം പദ്ധതികളുടെ വിവരങ്ങളടങ്ങിയ പ്രധാന ഭാഗങ്ങളടക്കം  ഇംഗ്ലിഷില്‍   തയാറാക്കിയതാണ് കൗണ്‍സിലന്‍മാരെ നട്ടംതിരിച്ചത്.
കൗണ്‍സിലര്‍മാര്‍ക്ക്  കോപ്പി നല്‍കിയെങ്കിലും പലര്‍ക്കും ഇതിന്റെ പൂര്‍ണവിവരങ്ങള്‍ ഒന്നും മനസ്സിലായില്ല. ഇതിനിടയില്‍ ബജറ്റ് സംബന്ധമായ ചര്‍ച്ച നടത്താനുള്ള ഭരണ സമിതിയുടെ നീക്കം പ്രതിപക്ഷ അംഗങ്ങള്‍ എതിര്‍ത്തു. പദ്ധതി സംബന്ധിച്ച കാര്യങ്ങള്‍ പഠിക്കാന്‍ കൂടുതല്‍ സമയം അനുവദിക്കണമെന്ന് അവര്‍ ആവശ്യപ്പെട്ടു. ഇതോടെ ചര്‍ച്ച 29ലേക്ക് മാറ്റുകയായിരുന്നു. സര്‍ക്കാര്‍ ഓഫിസുകളില്‍ ഭരണഭാഷക്ക് പ്രാമുഖ്യം നല്‍കണമെന്ന സര്‍ക്കാര്‍ നിര്‍ദേശം നിലനില്‍ക്കെ ബജറ്റ് കോപ്പി ഇംഗ്ലിഷില്‍ തയാറാക്കിയത് കൗണ്‍സിലര്‍മാര്‍ക്കിടയില്‍ ഏറെ പ്രതിഷേധങ്ങള്‍ക്ക് അവസരമൊരുക്കിയിട്ടുണ്ട്. 'കില' തയാറാക്കിയ സോഫ്റ്റ് വെയര്‍ വഴിയാണ് ബജറ്റ് തയാറാക്കിയതെന്ന്  നഗരസഭാ ചെയര്‍പേഴ്‌സണ്‍ കെ.ടി.റഹീദ പറഞ്ഞു. ബജറ്റിന്റെ കോപ്പി സ്ഥലത്തെത്തിയ മാധ്യമ പ്രവര്‍ത്തകര്‍ക്കും നല്‍കിയിരുന്നില്ല.