നിലമ്പൂര്‍: നഗരത്തില്‍ ഒപ്റ്റിക്കല്‍ ഫൈബര്‍ കേബിള്‍ സ്ഥാപിക്കുന്നതിന് അധിക നിരക്ക് ഈടാക്കരുതെന്ന സര്‍ക്കാര്‍ ഉത്തരവ് നിലമ്പൂര്‍ നഗരസഭക്ക് അനുകൂലം. ഒ.എഫ്.സി സ്ഥാപിക്കുന്ന സ്വകാര്യ ടെലികോം സേവന ദാതാക്കളില്‍നിന്ന് തദ്ദേശ സ്ഥാപനങ്ങള്‍ അധിക നിരക്ക് ഈടാക്കരുതെന്ന് കഴിഞ്ഞ ദിവസമാണ് സര്‍ക്കാര്‍ ഉത്തരവിട്ടത്. തദ്ദേശ സ്ഥാപനങ്ങളുടെ നടപടി വിവര സാങ്കേതിക വിദ്യയുടെ പ്രയോജനം പൊതുജനങ്ങള്‍ക്ക് ലഭ്യമാക്കുന്നതില്‍ തടസം സൃഷ്ടിക്കുന്നതായി സമിതി വിലയിരുത്തിയെന്നും അഡീഷനല്‍ ചീഫ് സെക്രട്ടറിയുടെ ഉത്തരവിലുണ്ട്.
തറവാടക പോലും ഈടാക്കാതെ റിലയന്‍സ് കമ്പനിക്കു വേണ്ടി നഗരസഭ അനുമതി നല്‍കിയത് വന്‍ വിവാദമായിരുന്നു. നഗരസഭക്കെതിരേ പ്രതിഷേധവുമായി സി.പി.എമ്മും, സി.പി.ഐയും, സ്വതന്ത്ര കൗണ്‍സിലറും ആരോപിച്ച് രംഗത്തെത്തിയിരുന്നു. നഗരസഭ ഓഫിസ് ഉപരോധം ഉള്‍പ്പെടെ സമരങ്ങള്‍ നടത്തുകയും ചെയ്തിരുന്നു.
നഗരസഭാ പരിധിയിലെ 11 കിലോമീറ്റര്‍ റോഡില്‍ റിലയന്‍സ് കമ്പനിക്ക് ഒപ്റ്റിക്കല്‍ ഫൈബര്‍ കേബിള്‍ സ്ഥാപിക്കാന്‍ നല്‍കിയ കരാര്‍വഴി കോടിക്കണക്കിന് രൂപയുടെ നഷ്ടം വരുത്തിയതായി ആരോപിച്ചായിരുന്നു സമരങ്ങള്‍ നടത്തിയിരുന്നത്. രണ്ടു കോടിയിലേറെ രൂപ ലഭിക്കേണ്ടിയിരുന്ന സ്ഥാനത്ത് കരാറിലെ അപാകതമൂലം 68 ലക്ഷമാണ് ലഭിച്ചതെന്നും ആരോപണമുയര്‍ത്തിയിരുന്നു. നഗരസഭാധ്യക്ഷ പത്മിനി ഗോപിനാഥ്, അന്നത്തെ സെക്രട്ടറി എന്നിവരെ എതിര്‍ കക്ഷിയാക്കി കോഴിക്കോട് വിജിലന്‍സ് കോടതിയില്‍ പരാതിയും നല്‍കിയിരുന്നു. പുതിയ ഉത്തരവ് വന്നതോടെ ഇവര്‍ക്ക് തിരിച്ചടിയായിരിക്കുകയാണ്.