തിരുവനന്തപുരം: ആറു തസ്തികകളില്‍ ചുരുക്കപ്പട്ടിക പ്രസിദ്ധീകരിക്കാന്‍ ഇന്നലെ ചേര്‍ന്ന പി.എസ്.സി യോഗം തീരുമാനിച്ചു.
മെഡിക്കല്‍ വിദ്യാഭ്യാസ വകുപ്പില്‍ സീനിയര്‍ ലക്ചറര്‍ ഇന്‍ ഓര്‍ത്തോപീഡിക്‌സ് (ഒന്നാം എന്‍.സി.എ.-മുസ്‌ലിം,മാപ്പിള, എല്‍.സി ,ആംഗ്ലോ ഇന്ത്യന്‍), കേരള സ്റ്റേറ്റ് പ്ലാനിങ് ബോര്‍ഡില്‍ റിസര്‍ച്ച് അസിസ്റ്റന്റ്, ഹയര്‍ സെക്കന്‍ഡറി വിദ്യാഭ്യാസ വകുപ്പില്‍ ഹയര്‍ സെക്കന്‍ഡറി സ്‌കൂള്‍ ടീച്ചര്‍ ജൂനിയര്‍ (സോഷ്യോളജി), വൊക്കേഷണല്‍ ഹയര്‍ സെക്കന്‍ഡറി വിദ്യാഭ്യാസ വകുപ്പില്‍ വൊക്കേഷണല്‍ ഇന്‍സ്ട്രക്ടര്‍ ഡയറിങ് മില്‍ക്ക് പ്രൊഡക്ട്‌സ്, വൊക്കേഷണല്‍ ഇന്‍സ്ട്രക്ടര്‍ റഫ്രിജറേഷന്‍ ആന്‍ഡ് എയര്‍ കണ്ടിഷനിങ് എന്നീ തസ്തികളിലേയ്ക്കാണ് ചുരുക്ക പട്ടിക പ്രസിദ്ധീകരിക്കുക. കോളജ് വിദ്യാഭ്യാസ വകുപ്പില്‍ ലക്ചറര്‍ ഇന്‍ ജേര്‍ണലിസം തസ്തികയിലേയ്ക്ക് ഓണ്‍ലൈന്‍ പരീക്ഷ നടത്താനും കൊല്ലം ജില്ലയില്‍ സൈനിക് വെല്‍ഫയര്‍ വകുപ്പില്‍ ഡൈവര്‍ ഗ്രേഡ് രണ്ട് തസ്തികയില്‍ പ്രായോഗിക പരീക്ഷ നടത്താനും യോഗം തീരുമാനിച്ചു.

കൂടാതെ വൊക്കേഷണല്‍ ഹയര്‍ സെക്കന്‍ഡറി വിദ്യാഭ്യാസ വകുപ്പില്‍ വൊക്കേഷണല്‍ ടീച്ചര്‍ (ഓഫിസ് സെക്രട്ടറീഷിപ്പ്-രണ്ടാം എന്‍.സി.എ.-എസ്.ഐ.യു.സി.നാടാര്‍,ആംഗ്ലോ ഇന്ത്യന്‍.) മാതൃ റാങ്ക്പട്ടികയില്‍ നിന്നും മറ്റുപിന്നാക്ക വിഭാഗത്തില്‍പ്പെട്ട ഉദ്യോഗാര്‍ഥികളെ കൊണ്ട് ഈ ഒഴിവ് നികത്താനും, തുറമുഖ വകുപ്പില്‍ സീമാന്‍ തസ്തികയ്ക്കായി അപേക്ഷിച്ചിട്ടുള്ള ഉദ്യോഗാര്‍ഥികളില്‍ നിന്ന് സെല്‍ഫ് ഡിക്ലറേഷന്‍ അപ്‌ലോഡ് ചെയ്യാനും യോഗം നിര്‍ദേശിച്ചു.