കാസര്‍കോട്: മംഗളൂരു എം.പി നളിന്‍കുമാര്‍ കട്ടീല്‍ നടത്തിയ വിവാദ പ്രസംഗത്തിന്റെ പൂര്‍ണ രൂപം കണ്ടെത്താന്‍ പൊലിസ് നീക്കം. കഴിഞ്ഞ 18ന് ആര്‍.എസ്.എസ് നേതാവായിരുന്ന അഡ്വ. സുഹാസ് അനുസ്മരണത്തിന്റെ ഭാഗമായി സംഘടിപ്പിച്ച കബഡി ടൂര്‍ണമെന്റിന്റെ ഉദ്ഘാടന ചടങ്ങിലാണ് നളിന്‍ കുമാര്‍ കട്ടീല്‍ പ്രകോപന പ്രസംഗം നടത്തിയത്. ഈ പ്രസംഗമാണ് പഴയ ചൂരിയില്‍ മദ്‌റസാ അധ്യാപകനെ കൊലപ്പെടുത്തുന്നതിലേക്ക് വഴിവച്ചതെന്നാണ് ആരോപണം.
പ്രസംഗത്തിന്റെ പൂര്‍ണ രൂപം കണ്ടെത്തുന്നതിനായി പൊലിസ് സംഘാടകര്‍ക്ക് നോട്ടിസ് നല്‍കിയിരുന്നു. എന്നാല്‍, സംഘാടകരും ടൂര്‍ണമെന്റ് ലൈവായി സംപ്രേഷണം ചെയ്ത പ്രാദേശിക ചാനലുകാരും നല്‍കിയ സിഡിയില്‍ വിവാദപരാമര്‍ശങ്ങളൊന്നുമില്ല. എഡിറ്റു ചെയ്ത സിഡിയാണ് ഇപ്പോള്‍ പൊലിസിന് ലഭിച്ചിരിക്കുന്നത്.