കൊട്ടാരക്കര: ഉമ്മന്നൂരില്‍ വ്യാപാരിയെ കൊലപ്പെടുത്തി സ്വര്‍ണവും പണവും കവര്‍ന്ന കേസില്‍ പ്രതി റിമാന്‍ഡില്‍
ഉമ്മന്നൂര്‍ സൊസൈറ്റി മുക്കില്‍ ഹാര്‍ഡ് വെയര്‍ കട നടത്തിവന്ന ഉമ്മന്നൂര്‍ പാറംകോട് ഓണോലില്‍ കിഴക്കേകര വീട്ടില്‍ ബേബി (74 ) യെ കൊലപ്പെടുത്തിയ കേസിലാണ് ഉമ്മന്നൂര്‍ കൊച്ചുപുത്തന്‍ വീട്ടില്‍ രാഗേഷ് ( 25)അറസ്റ്റിലായത്. ഞായറാഴ്ച രാത്രി 8.30 തോടെയാണ് ബേബിയെ കടയുടെ പിന്നില്‍ മരിച്ച നിലയില്‍ കണ്ടെത്തുന്നത്. സ്വര്‍ണമാലയും പണവും നഷ്ടമായതോടെ കൊലപാതകമെന്ന് സംശയിച്ച പൊലിസ് നടത്തിയ അന്വേഷണത്തിലാണ് പ്രതിയെ പിടികൂടാന്‍ സാധിച്ചത്.
സംഭവത്തെക്കുറിച്ച് പൊലിസ് പറയുന്നതിങ്ങനെ : ബേബിയോട് ലഹരിക്കടിമയായ നാട്ടുകാരന്‍ കൂടിയായ രാഗേഷ് പല തവണ ലഹരി വസ്തുക്കള്‍ വാങ്ങാന്‍ പണം ആവശ്യപ്പെട്ടിരുന്നു. പണം നല്‍കാന്‍ വിസമ്മതിച്ച ബേബിയോടുള്ള വിരോധമാണ് കൊലപാതകത്തില്‍ എത്തിച്ചതെന്ന് പ്രതി പൊലിസിനോട് സമ്മതിച്ചിട്ടുണ്ട്. കൊലപാതകം നടത്തുന്നതിന് മുന്‍പായി വൈകിട്ട് പ്രതി ബേബിയെ ആക്രമിക്കാന്‍ തക്കം പാര്‍ത്ത് കടയുടെ അടുത്ത് നിന്നിരുന്നു. കടയിലേക്ക് ആളുകള്‍ വന്നു തുടങ്ങിയതോടെ ആ ഉദ്യമം അവസാനിപ്പിച്ച് മടങ്ങി.
പിന്നീട് വീട്ടില്‍ പോയി മടങ്ങി എത്തിയ പ്രതി ആളൊഴിഞ്ഞ സമയമായ ഏഴോടെ കടയിലെത്തി അതിക്രമിച്ച് കയറി പണം അപഹരിക്കാന്‍ ശ്രമിച്ചു.
തടയാന്‍ ശ്രമിച്ച ബേബിയെ കഴുത്ത് ഞെരിച്ച് കൊലപ്പെടുത്തിയ ശേഷം കഴുത്തില്‍ കിടന്ന ഒന്നര പവനോളം തൂക്കമുള്ള മാലയും പണവും കവര്‍ന്ന ശേഷം മൃതദേഹം കടയുടെ പിന്നില്‍ ഉപേക്ഷിക്കുകയായിരുന്നു. സംഭവസ്ഥലത്ത് നിന്നും രക്ഷപ്പെട്ട പ്രതി സ്വര്‍ണമാല സമീപത്തുള്ള കുളത്തിന് സമീപത്തെ പൊത്തില്‍ ഒളിപ്പിച്ച് വെച്ച് രക്ഷപ്പെടാനുള്ള ശ്രമത്തിനിടയിലാണ് പൊലിസിന്റെ വലയിലാകുന്നത്.
കൊലപാതകം നടത്തി ഒരു മണിക്കൂറിനകം പൊലിസ് പ്രതിയെ പിടി കൂടി. മുന്‍പും കൊലപാതക ശ്രമം നടത്തിയതിന് പ്രതിക്കെതിരേ പൂയപ്പള്ളി പൊലിസില്‍ കേസ് നിലവിലുണ്ട്. പൊലിസ് പ്രതിയെ സംഭവ സ്ഥലത്ത് എത്തിച്ച് തെളിവ് ശേഖരിച്ചു. ഒളിപ്പിച്ച്‌വച്ച സ്വര്‍ണം കണ്ടൈടുത്തു.
പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു. കൊല്ലം റൂറല്‍ ജില്ലാ പൊലിസ് മേധാവി ബി. അശോകന്റെ നിര്‍ദേശ പ്രകാരം കൊട്ടാരക്കര ഡിവൈ. എസ്.പി ജെ ജേക്കബിന്റെ നേതൃത്വത്തില്‍ കൊട്ടാരക്കര ഇന്‍സ്‌പെക്ടര്‍ ഒ.എ സുനില്‍, ശാസ്താംകോട്ട ഇന്‍സ്‌പെക്ടര്‍ പ്രശാന്ത്, എഴുകോണ്‍ ഇന്‍സ്‌പെക്ടര്‍ ബിനുകുമാര്‍ , കൊട്ടാരക്കര എസ് .ഐ സി. കെ മനോജ് , എസ്.ഐ അരുണ്‍, ഷാഡോ ടീം എസ്.ഐ. ബിനോജ്, പൂയപ്പള്ളി എസ്.ഐ രജീഷ് കുമാര്‍, എ എസ് ഐ മാരായ ഷാജഹാന്‍, സജീവ്, അനില്‍കുമാര്‍, എസ് സി പി ഒ മാരായ രമേശ്,വിനോദ് ,ഹരിലാല്‍ എന്നിവരടങ്ങിയ സംഘമാണ് പ്രതിയെ പിടികൂടിയത്.