അരൂര്‍: കടല്‍ഭിത്തി തകര്‍ത്ത് തിരമാലകള്‍ കരയിലേക്ക് എത്തിതുടങ്ങിയതോടെ തീരദേശവാസികള്‍ പരിഭ്രാന്തിയിലായി. അരൂര്‍ പള്ളിത്തോട് ചാപ്പക്കടവ് മേഖലയിലെ തീരദേശ വാസികളാണ് ഭീതിയിലകപ്പെട്ട് കഴിയുന്നത്.
കഴിഞ്ഞ ദിവസം ഉണ്ടായ ശക്തമയ കാറ്റിലൂടെയാണ് കടല്‍ക്ഷോഭം രൂക്ഷമായത്. ഇതോടെയാണ് വിലവിലുള്ള ഭിത്തികള്‍ക്കിടയിലൂടെ കടല്‍വെള്ളം കരയിലേക്ക് തള്ളികയറികൊണ്ടിരിക്കുന്നത്. പലപ്പോഴും വെള്ളം വീടുകള്‍ക്കകത്തേക്ക് എത്തുകയാണെന്നും ഉറങ്ങുവാന്‍ പോലും കഴിയാത്ത അവസ്ഥയാണ് സംജാതമായിരിക്കുന്നതെന്നും തീരദേശവാസികള്‍ ആരോപിക്കുന്നു.
ഇന്നലെ വൈകിട്ടോടെയാണ് ശക്തമായ തിരമാലകള്‍ കരയിലേക്ക് എത്തി തുടങ്ങിയത്. നിരവധി വീടുകള്‍ വെള്ളക്കെട്ടിലകപ്പെട്ടിരിക്കുകയാണ്. വിവിധയിടങ്ങളില്‍ തകര്‍ന്ന കടല്‍ഭിത്തി കെട്ടിയും നിലവിലുള്ള ഭിത്തി കൂടുതല്‍ സുരക്ഷിതമാക്കണമെന്നും ആവശ്യപ്പെട്ടു തുടങ്ങിയിട്ട് നാളുകളേറെയായി.
എന്നാല്‍ യാതൊരുവിധ നടപടികളും ഉണ്ടാകാത്തതില്‍ തീരദേശ വാസികള്‍ക്കിടയില്‍ വന്‍ പ്രതിഷേധമാണ് നിലനില്‍ക്കുന്നത്.
പലയിടങ്ങളിലും ഭിത്തികെട്ടുന്നതിനായി പാറക്കല്ലുകള്‍ ഇറക്കി വച്ചിട്ടുണ്ടെങ്കിലും നിര്‍മ്മാണ പ്രവര്‍ത്തനം നടത്തുവാന്‍ ബന്ധപ്പെട്ട അധികൃതര്‍ തയ്യാറാകുന്നില്ല.
മണല്‍ ചാക്ക് നിരത്തി താല്‍ക്കാലിക സംവിധാനം ഉണ്ടാക്കുമെന്ന് ആഴ്ചകള്‍ക്കു മുന്‍പ് അധികൃതര്‍ പറഞ്ഞിരുന്നു. എന്നാല്‍ അതിനും ഇതുവരെ തയ്യാറായിട്ടില്ല.
നൂറുകണക്കിന് വീടുകളാണ് ചാപ്പകടവ് പ്രദേശത്തുള്ളത്. യാതൊരുവിധ സുരക്ഷിതവും ഇല്ലാത്ത അവസ്ഥയിലാണ് ചാപ്പക്കടവ് നിവാസികള്‍. അടിയന്തരമായി തങ്ങളുടെ ജീവനും സ്വത്തിനും സംരക്ഷണം നല്‍കണമെന്നാണ് ഇവര്‍ ആവശ്യപ്പെടുന്നത്.