പുതുനഗരം:ഗുണനിലവാരമില്ലാത്ത നെല്‍വിത്ത് വ്യാപകമാകുന്നു. സീഡ് അതോറിറ്റിയുടെ വിത്തുല്‍പാദനം അന്വേഷിക്കണമെന്ന് കര്‍ഷകര്‍. കേരള സീഡ് അതോറിറ്റിയുടെ നേതൃത്വത്തില്‍ നെല്‍ വിത്ത് ഉല്‍പാദന കര്‍ഷകരെ നീരീക്ഷിക്കാതെ വിത്ത് സംഭരിക്കുന്നതില്‍ വന്‍തോതില്‍ അഴിമതി നടക്കുന്നതായി കര്‍ഷകര്‍ കെ.എസ്.എസ്.ഡി.എ യുടെ എരുത്തേമ്പതി വിത്തു സംസ്‌കരണ കേന്ദ്രത്തിന്റെ നേതൃത്വത്തിലാണ് ജില്ലയില്‍ നെല്‍വിത്ത് ഉല്‍പാദനം നടക്കുന്നത്. നെല്‍വിത്ത് ഉല്‍പാദിപ്പിക്കുന്ന കര്‍ഷകര്‍ക്ക് പ്രത്യേകം പരിശീലനം നല്‍കിയാണ് വിത്തുല്‍പാദനത്തിന് കണ്ടെത്തുന്നത് ഇത്തരത്തില്‍ വിത്തുല്‍പാദിപ്പിക്കുന്ന കര്‍ഷകര്‍ക്ക് വിത്തുല്‍പാദനത്തിനുള്ള വിത്ത് നല്‍കി കെ.എസ്.എസ്.ഡി.എ യുടെ ഉദ്യോഗസ്ഥരുടെ നേതൃത്വത്തില്‍ നടക്കുന്ന വിത്തുല്‍പാദനത്തില്‍ എല്ലാ ഘട്ടങ്ങളിലും പരിശോധന വേണമെന്ന് നിയമമുണ്ടെങ്കിലും ഉദ്യോഗസ്ഥരുടെ പരിധോശന പ്രഹസനമാകുന്നതിനാല്‍ ഗുണമേന്മയില്ലാത്ത നെല്‍വിത്ത് വ്യാപകമായി ഉല്‍പാദിപ്പിക്കുവാന്‍ ഇടയാക്കുന്നതായി പാടശേഖരസമിതികള്‍ ആരോപിക്കുന്നു.
ഇതുകൂടാതെ വിത്തു നെല്ല് സംഭരിക്കുന്നതിനു മുമ്പ് നെല്‍വിത്ത് കെ.എസ്.എസ്.ഡി.എ. ഉദ്യോഗസ്ഥര്‍ എത്തി പരിശോധനക്കായി സാമ്പിള്‍ ശേഖരിക്കുന്നു. പരിശോധനയില്‍ 90 ശതമാനത്തിലധികം ഗുണമേന്മ ഉറപ്പാക്കിയതിനു ശേഷമാണ് സാമ്പിള്‍ ശേഖരിച്ച് വിത്ത് സംഭരിക്കുന്നത്. സാമ്പിള്‍ ആലപ്പുഴയിലെ ലാബില്‍ പരിശോധിച്ച് ഫലം തിരിച്ചുവരുന്നതിനു മുമ്പ് സംഭരിച്ച് വിത്ത് നെല്ല് മാറ്റി ഉപയോഗശൂന്യമായ നെല്ല് കെ.എസ്.എസ്.ഡി.എക്ക് അയക്കുന്നവരാണ് മിക്ക സമയങ്ങളിലും കര്‍ഷകരുടെ അന്തകരായിമാറുന്നത്. കെ.എസ്.എസ്.ഡി.എ.യില്‍നിന്നും ജില്ലയിലെ കൃഷിഭവനുകളിലൂടെ വിതരണം ചെയ്യുന്ന നെല്‍വിത്ത് ഉപയോഗപ്രദമാകുമെന്ന വിശ്വാസത്തില്‍ കൃഷിഭവനുകളിലൂടെ വാങ്ങുന്ന കര്‍ഷകര്‍ വിത്തിറക്കുമ്പോഴാണ് വാരിപൂരോഗവും, മുളകള്‍ കുറയുന്നതും ശ്രദ്ധയില്‍പെടുന്നത്.ഇത്തരത്തില്‍ ഗുണമേന്മയില്ലാത്തനെല്‍വിത്തിതെിരെ കഴിഞ്ഞനാല് വര്‍ഷത്തോളമായി ഉണ്ടായിട്ടുള്ള പരാതികള്‍ക്കെതിരെ സത്യസന്ധമായ നടപടികള്‍ കെ.എസ്.എസ്.ഡി.എ ഉദ്യോഗസ്ഥര്‍ സ്വീകരിക്കുന്നില്ലെന്ന് കര്‍ഷകര്‍ ആരോപിക്കുന്നു.
വിത്ത് നെല്ലിന് കിലോ 31.70 രൂപ നല്‍കിയാണ് സംഭരിക്കുന്നത.് വര്‍ഷത്തില്‍ 1600-1800 ടണ്‍ വരെയാണ് കെ.എസ്.എസ്.ഡി.എ. എരുത്തേമ്പതിയിലെ കേന്ദ്രത്തില്‍ നെല്‍വിത്ത് ശേഖരിക്കുന്നത്.കാസര്‍കോടുമുതല്‍ ആലപ്പുഴവരെയുള്ള ജില്ലകളില്‍ എരുത്തേമ്പതി കേന്ദ്രത്തില്‍നിന്നും വിത്തുനെല്ല് വിതരണം നടക്കുന്നുണ്ട്.
സാധാരണ നെല്ലിനേക്കാള്‍ കൂടുതല്‍ വില വിത്തുനെല്ലിനു നല്‍കുന്നതിനാല്‍ വിത്തുനെല്ലെന്ന പേരില്‍ ഗുണമെന്മകുറഞ്ഞ നെല്‍വിത്ത് നല്‍കുന്ന കര്‍ഷകരെ കണ്ടെത്തി നടപടിയെടുക്കുവാന്‍ കെ.എസ്.എസ്.ഡി.എ തയ്യാറാവണമെന്നും ഗുണമേന്മ കുറഞ്ഞ നെല്‍വിത്ത് സംഭരിച്ച് കര്‍ഷകര്‍ക്ക് വിതരണം നടത്തീയിട്ടുണ്ടോ എന്ന് പരിശോധിക്കുവാന്‍ സമഗ്രമായ വകുപ്പുതല പരിശോധനകള്‍ കെ.എസ്.എസ്.ഡി.എ എരുത്തേമ്പതി കേന്ദ്രീകരിച്ച് നടത്തണമെന്നും കര്‍ഷകര്‍ ആവശ്യപെട്ടു.