ഹരിപ്പാട്: കടല്‍ക്ഷോഭം ശക്തമായതോടെ തീരദേശ വാസികളുടെ ദുരിതവും ഇരട്ടിയായി. നാമമാത്ര വീടുകള്‍ മാത്രമേ കടല്‍ക്ഷോഭത്തെ തുടര്‍ന്ന് ഭീഷണി നേരിടുന്നുള്ളൂവെങ്കിലും യാത്രാ മാര്‍ഗങ്ങള്‍ അടയുന്ന സാഹചര്യമാണ് ഉള്ളത്. ആറാട്ടുപുഴ ബസ് സ്റ്റാന്റ് മുതല്‍ തെക്കോട്ട് ഏകദേശം 600 മീറ്റര്‍ റോഡിലാണ് ശക്തമായ നാശം വിതയ്ക്കുന്നത് . കടലിനോട് ഏറ്റവും അടുത്ത് കിടക്കുന്ന ഇവിടെ ശക്തമായ തിരയാണ് റോഡിലേക്ക് പതിക്കുന്നത്. തകര്‍ന്നടിഞ്ഞ് കിടന്ന ഇവിടെ സമീപകാലത്ത് ടാര്‍ ചെയ്ത് സഞ്ചാരയോഗ്യമാക്കിയെങ്കിലും റോഡിന്റെ പടിഞ്ഞാറുവശം തകര്‍ന്നു തുടങ്ങി.
ഇവിടെ കടല്‍ഭിത്തിയുണ്ടെങ്കിലും മതിയായ ഉയരമില്ലാത്തതിനാല്‍ കടല്‍ഭിത്തിക്ക് മുകളിലൂടെ തിരയടിച്ചുകയറിയാണ് റോഡ് തകരുന്നത്. ഇതോടെ റോഡ് കോണ്‍ക്രീറ്റ് ചെയ്യണമെന്ന ആവശ്യം ശക്തമായി. ഓക്കി ദുരന്തത്തിന് ശേഷം റോഡ് കോണ്‍ക്രീറ്റ് ചെയ്യണമെന്ന് ആവശ്യപ്പെട്ടെങ്കിലും കാര്യക്ഷമമല്ലാത്ത രീതിയില്‍ ടാര്‍ ചെയ്യുകയായിരുന്നു. ബസ് സ്റ്റാന്റിനു തെക്ക് വശമാണ് കടല്‍ക്ഷോഭത്തില്‍ ആദ്യമെ തകരുന്നത്. ഇതുവഴിയുള്ള വാഹന സര്‍വീസ് നിലച്ചാല്‍ വലിയഴീയ്ക്കല്‍ വരെയുള്ള ജനങ്ങളുടെ യാത്രാമാര്‍ഗമാണ് അടയുന്നത്.
എ.കെ.ജി നഗര്‍, നല്ലാണിക്കല്‍, എസ് എന്‍ നഗര്‍ തുടങ്ങിയ പ്രദേശങ്ങളിലും ഭിത്തികള്‍ക്കിടയിലൂടെ തിര റോഡിലേക്ക് പതിക്കുന്നുണ്ട്. കാല്‍ നൂറ്റാണ്ടോളം പഴക്കമുള്ള കടല്‍ ഭിത്തികള്‍ പലയിടത്തും തകര്‍ന്നടിഞ്ഞ നിലയിലാണ്. അടിഭാഗത്തെ മണല്‍ നീങ്ങുന്നത് കടല്‍ഭിത്തികളുടെ തകര്‍ച്ചക്ക് കാരണമാകുന്നതായി തീരദേശ വാസികള്‍ പറയുന്നു. കടല്‍ഭിത്തി ഇല്ലാത്ത സ്ഥലങ്ങളിലാകട്ടെ റോഡിലേക്ക് വന്‍തോതിലാണ് മണല്‍ അടിച്ചു കയറുന്നത്. ഇതിനു ശാശ്വത പരിഹാരം കാണണമെന്നാവശ്യപ്പെട്ട് പ്രക്ഷോഭങ്ങളും റവന്യു അധികൃതരെ തടഞ്ഞു വെച്ച സംഭവങ്ങളും നിരവധി തവണ അരങ്ങേറിയിട്ടുണ്ട്. എന്നാല്‍ ശാശ്വത പരിഹാരം ഇന്നും കണ്ടിട്ടില്ലന്നും ജനപ്രതിനിധികള്‍ ഉള്‍പ്പടെയുള്ളവര്‍ ചൂണ്ടിക്കാണിക്കുന്നു. നല്ലാണിക്കലാകട്ടെ ഒരു വീട് ശക്തമായ രീതിയില്‍ അപകട ഭീഷണി നേരിടുകയാണ്.
വീടും കടലും തമ്മില്‍ നാല്‍പ്പത് മീറ്ററിലധികം അകലമുണ്ടായിരുന്നിടത്ത് ഇപ്പോള്‍ പത്ത് മീറ്റര്‍ പോലുമില്ല. വീടിന്റെ പടിഞ്ഞാറു ഭാഗത്ത് മണല്‍ ചാക്കുകള്‍ അടുക്കിയാണ് സംരക്ഷണം ഏര്‍പ്പെടുത്തിയിരിക്കുന്നത്. ജൂണ്‍ ജൂലൈ മാസമാകുന്നതോടെ ദുരിതത്തിന്റെ വ്യാപ്തി വര്‍ദ്ധിക്കുമെന്ന ആശങ്കയിലാണ് തീരദേശ ജനത.