റിയോ ഡി ജനീറോ: ബാഴ്‌സലോണ സൂപ്പര്‍ താരം നെയ്മറും ബയേണ്‍ മ്യൂണിക്ക് താരം ഡഗ്ലസ് കോസ്റ്റയും റിയോ ഒളിംപിക്‌സിനുള്ള ബ്രസീല്‍ ഫുട്‌ബോള്‍ ടീമില്‍ ഇടംപിടിച്ചു. കഴിഞ്ഞ ദിവസം പ്രഖ്യാപിച്ച 18 അംഗ ടീമില്‍ ഇരുവരെയും ഉള്‍പ്പെടുത്തിയിട്ടുണ്ടെന്ന് ബ്രസീല്‍ ഫുട്‌ബോള്‍ കോണ്‍ഫെഡറേഷന്‍ വ്യക്തമാക്കി. ഇവരെ കൂടാതെ പാല്‍മിറസ് ഗോളി ഫെര്‍ണാണ്ടോ പ്രാസ് ആണ് ടീമിലിടം പിടിച്ച 23 വയസിന് മുകളിലുള്ള മൂന്നാമത്തെ താരം.
ഓഗസ്റ്റ് നാലിന് ദക്ഷിണാഫ്രിക്കയാണ് ആദ്യ മത്സരത്തില്‍ ബ്രസീലിന്റെ എതിരാളി. ഗ്രൂപ്പില്‍ ഇറാഖ്, ഡെന്‍മാര്‍ക്ക് എന്നിവരുമായിട്ടാണ് ബ്രസീലിന്റെ പിന്നീടുള്ള മത്സരങ്ങള്‍. ഒളിംപിക്‌സ് ആരംഭിക്കുന്നതിന് മുമ്പ് ജപ്പാനെതിരേ സൗഹൃദ മത്സരവും ബ്രസീല്‍ കളിക്കുന്നുണ്ട്.