ചെന്നൈ: 13 പേരുടെ മരണത്തിനിടയാക്കിയ പ്രക്ഷോഭത്തിനൊടുവില്‍ തൂത്തുക്കുടിയിലെ സ്റ്റര്‍ലൈറ്റ് സമരം അന്വേഷണം ക്രൈം ബ്രാഞ്ചിനു കൈമാറി. തമിഴ്‌നാട് ഡിജിപി ടികെ രാജേന്ദ്രനാണ് കേസ് ക്രൈം ബ്രാഞ്ചിനു വിട്ടത്.

കമ്പനിയുടെ ചെമ്പ് സംസ്‌കരണ പ്ലാന്റ് അടച്ചുപൂട്ടാന്‍ തമിഴ്‌നാട് സര്‍ക്കാര്‍ ഉത്തരവിട്ടിരുന്നു. സമീപപ്രദേശങ്ങളിലെ ജനങ്ങളുടെ ആരോഗ്യ പ്രശ്‌നങ്ങള്‍ക്ക് കാരണമാവുന്നുവെന്ന് ചൂണ്ടിക്കാട്ടിയാണ് ഉത്തരവിട്ടത്. പ്രദേശത്തെ സമരക്കാരുമായി മുഖ്യമന്ത്രി പളനസ്വാമി നടത്തിയ കൂടിക്കാഴ്ചയിലാണ് തീരുമാനം.

സംസ്‌കരണ ശാലയുടെ പ്രവര്‍ത്തനങ്ങള്‍ നിര്‍ത്തിവയ്ക്കാന്‍ സംസ്ഥാന മലിനീകരണ നിയന്ത്രണ ബോര്‍ഡ് ഉത്തരവിട്ടിരുന്നു. ഇതിനു പിന്നാലെയാണ് പ്ലാന്റ് പൂര്‍ണമായി പൂട്ടാന്‍ സര്‍ക്കാര്‍ ഇന്നലെ ഉത്തരവ് പുറപ്പെടുവിച്ചത്.

വായു, ജല മലിനീകരണത്തിന് പ്ലാന്റ് കാരണമാവുന്നുവെന്നും അതിനാല്‍ അടച്ചുപൂട്ടണമെന്നും ആവശ്യപ്പെട്ട് നടന്ന സമരത്തിന്റെ 100ാം ദിവസമാണ് പൊലിസ് വെടിവയ്പ് നടത്തിയത്.

വേദാന്ത കമ്പനിയുടെ ചെമ്പ് സംസ്‌കരണ പ്ലാന്റ് 1996ല്‍ ആണ് തമിഴ്‌നാട്ടില്‍ പ്രവര്‍ത്തനം ആരംഭിച്ചത്. 1998 മുതലാണ് ഇതിന്റെ പ്രവര്‍ത്തനം പൂര്‍ണമായത്. പ്ലാന്റിന്റെ പ്രവര്‍ത്തനം മലിനീകരണത്തിനും തദ്ദേശവാസികളുടെ ജീവിതത്തിനും പ്രശ്‌നങ്ങളുണ്ടാക്കുന്നുവെന്ന് ആരോപിച്ച് സമരങ്ങള്‍ നടത്തിയിരുന്നു.