തൃക്കരിപ്പൂര്‍: സംസ്ഥാന ഇന്റര്‍ ക്ലബ് ഫുട്‌ബോളിലെ നാലാം ദിനം നടന്ന ആദ്യ ക്വാര്‍ട്ടര്‍ ഫൈനലില്‍ കരുത്തരായ ഫുട്‌ബോള്‍ അക്കാദമി തിരൂരിനെ ഒന്നിനെതിരേ രണ്ടു ഗോളുകള്‍ക്കു പരാജയപ്പെടുത്തി ഗോകുലം എഫ്.സി മലപ്പുറം സെമിഫൈനലില്‍ കടന്നു.
ആദ്യ മത്സരത്തില്‍ ഗോകുലത്തെ മുന്നിലെത്തിച്ച മുന്‍ ബ്ലാസ്‌റ്റേഴ്‌സ് താരം സുശാന്ത് മാത്യുവിനെ ബെഞ്ചില്‍ ഇരുത്തി ബംഗാളി താരം പ്രീതം സര്‍ക്കാരിനെ ഇറക്കി പരീക്ഷണം നടത്തുകയായിരുന്നു ഗോകുലം കോച്ച് ബിനോ ജോര്‍ജ് . ഗോള്‍കീപ്പര്‍ മുഹമ്മദ് അസ്സറിനു പകരം കാസര്‍കോടുകാരനായ മിര്‍ഷാദിനും അവസരം നല്‍കി.
കഴിഞ്ഞ മത്സരത്തില്‍ ഉജ്വല നീക്കങ്ങള്‍ നടത്തിയ തിരൂരിന്റെ ജപ്പാന്‍ താരം അതിസുഷിക് മുന്‍ നിരയില്‍ കളി മറന്നത് തിരൂരിനു വലിയ നഷ്ടമായി. അപകടകാരികളായ തിരൂരിന്റ ഫസലുറഹ്മാന്‍ നജിമുദീന്‍, ഷഹീദ് എന്നിവരെ ഗോകുലം മാര്‍ക്ക് ചെയ്തത് നീക്കങ്ങള്‍ ദുര്‍ബലമാക്കി.
നാല്‍പ്പത്തിനാലാം മിനുട്ടില്‍ പരസ്പരം ഫൗള്‍ ചെയ്തതിന് മെയ്‌റോണ്‍ ഗോകുലം, മുഹമ്മദ് സല തിരൂര്‍ എന്നിവര്‍ മഞ്ഞക്കാര്‍ഡ് കണ്ടു.
ഇന്നു മതില്‍ഭാഗം തിരുവല്ല  ഡി.എഫ്.എ കോഴിക്കോടിനെ നേരിടും.