തൃക്കരിപ്പൂര്‍: വിദ്യാര്‍ഥികള്‍ സ്ഥാപിച്ച ബോര്‍ഡ് പ്രധാനധ്യാപകന്‍ എടുത്തു മാറ്റിയതില്‍ പ്രതിഷേധിച്ച് പി.ടി.എ സ്ഥാപിച്ച ബോര്‍ഡ് വിദ്യാര്‍ഥികള്‍ കീറി നശിപ്പിച്ചു.
ഇന്നലെ തൃക്കരിപ്പൂര്‍ വൊക്കേഷണല്‍ ഹയര്‍സെക്കന്‍ഡറി സ്‌കൂളിലാണു സംഭവം അരങ്ങേറിയത്.
സ്‌കൂള്‍ ഗേറ്റിനു മുന്നില്‍ സ്‌കൂളുമായോ സംഘടനയുമായോ ബന്ധപ്പെടാത്ത ബോര്‍ഡ് സ്ഥാപിച്ചത് പ്രിന്‍സിപ്പാളും പ്രധാനധ്യാപകനും ചോദ്യം ചെയ്യുകയും ബോര്‍ഡ് സ്ഥാപിച്ചവര്‍ രംഗത്തുവരണമെന്ന് ആവശ്യപ്പെടുകയും ചെയ്‌തെങ്കിലും ആരും ബോര്‍ഡിന്റെ പിതൃത്വം ഏറ്റെടുക്കാന്‍ വന്നില്ല.
ഇതോടെ വിദ്യാര്‍ഥികള്‍ സ്ഥാപിച്ചുവെന്നു പറയപ്പെടുന്ന രണ്ടു ബോര്‍ഡുകളും പ്രിന്‍സിപ്പള്‍ കീര്‍ത്തിമോന്‍ ജോസഫും പ്രധാനധ്യാപകന്‍ ഗംഗാധരന്‍ കരിവെള്ളൂരും എടുത്തുമാറ്റുകയായിരുന്നു.
ഇതോടെ ഒരു കൂട്ടം വിദ്യാര്‍ഥികള്‍ സ്‌കൂള്‍ കവാടത്തില്‍ പി.ടി.എ സ്ഥാപിച്ച വിവിധ അനുമോദന ബോര്‍ഡുകള്‍ നശിപ്പിക്കുകയും ചെയ്തു.
ഇതോടെ സ്‌കൂളില്‍ സംഘര്‍ഷാവസ്ഥയുണ്ടായതോടെ ചന്തേര പൊലിസ് സ്ഥലത്തെത്തി രംഗം ശാന്തമാക്കി.
പി.ടി.എ സ്ഥാപിച്ച ബോര്‍ഡ് നശിപ്പിച്ചവര്‍ തന്നെ പുതിയ ബോര്‍ഡ് സ്ഥാപിക്കണമെന്ന ഉത്തരവു നല്‍കിയാണു പൊലിസ് സ്ഥലം വിട്ടത്