ദമാം: അഞ്ചാം തലമുറയിലെ അതിവേഗ ഇന്റര്‍നെറ്റ് സംവിധാനം നടപ്പിലാക്കുന്ന മധ്യേഷ്യയിലെ ആദ്യ നഗരമായി അല്‍ഖോബാര്‍. കിഴക്കന്‍ സഊദിയിലെ പ്രമുഖ നഗരമായ ബഹ്‌റൈനുമായി അതിര്‍ത്തി പങ്കിടുന്നതുമായ അല്‍ ഖോബാറിലാണ് മിന എന്നറിയപെടുന്ന മിഡില്‍ ഈസ്റ്റ് ആന്‍ഡ് നോര്‍ത്ത് ആഫ്രിക്ക രാജ്യങ്ങളിലെ ആദ്യ 5 ജി നെറ്റവര്‍ക്ക് സംവിധാനം നടപ്പിലാക്കിയത്.

അന്താരാഷ്ട്ര കമ്മ്യുണിക്കേഷന്‍ സെന്ററാണ് ഇക്കാര്യം വ്യക്തമാക്കിയത്. ഇന്റര്‍നെറ്റ് സാങ്കേതിക രംഗത്ത് കുതിച്ചു ചാട്ടം പ്രതീക്ഷിക്കുന്ന അഞ്ചാം തലമുറയിലെ ഇന്റര്‍നെറ്റ് സേവനത്തിന്റെ ആദ്യ ഘട്ടം റമദാന്‍ ആദ്യവാര്യത്തിലാണ് നടപ്പിലാക്കിയത്. ലോകമെമ്പാടുമുള്ള വിവര, വാര്‍ത്താവിനിമയ സാങ്കേതികവിദ്യകളെ സംബന്ധിച്ച പ്രശ്‌നങ്ങള്‍ പരിഹരിക്കുന്നതിനല്ല യുണൈറ്റഡ് നേഷന്‍സിന്റെ പ്രത്യേക ഏജന്‍സി പദ്ധതിയെ സ്വാഗതം ചെയ്തു.

സഊദി ഇന്‍ഫര്‍മേഷന്‍ ആന്‍ഡ് ടെക്‌നോളജ്ജി കമ്മീഷന്റെ കീഴില്‍ ദേശീയ ഐ സി ടി ആക്റ്റ് പ്രകാരം അന്താരാഷ്ട്ര ടെലികമ്മ്യുണിക്കേഷന്‍ സെന്ററിന് 5 ജി മൈബൈല്‍ നെറ്റവര്‍ക്ക് ഉപയോഗിക്കാനും പരിശോധിക്കാനും ലൈസന്‍സ് നല്‍കുകയായിരുന്നു. 3.6 Ghz മുതല്‍ 3.8Ghz വരെ ബാന്‍ഡ് വിഡ്ത്തിലുള്ള 100 മെഗാ ഹേര്‍ട്‌സ് ചാനലുകള്‍ ഉപയോഗിച്ച് പരീക്ഷണം നടത്തുവാനാണ് സഊദി ടെലികോം അതോറിറ്റി ലൈസന്‍സ് നല്‍കിയത്.

വയര്‍ലെസ് ടെക്‌നോളജിയിലെ ഡാറ്റാ സംപ്രേക്ഷണത്തിന്റെ അളവ് നേരത്തേയുണ്ടായിരുന്നതിനേക്കാള്‍ സെക്കന്‍ഡില്‍ ഒരു ഗിഗാബൈറ്റ് അഥവാ ആയിരം എം ബി പി എസ് ആയി വര്‍ധിച്ചതായി അന്താരാഷ്ട്ര കമ്മ്യുണിക്കേഷന്‍ സെന്റര്‍ പ്രസ്താവനയില്‍ പറഞ്ഞു. പുതിയ ടെക്‌നോളജിയുടെ സവിശേഷതയും കഴിവും ഏറ്റവും മികച്ചതായതാണ് ഇന്റര്‍നെറ്റ് ഡാറ്റ ഇത്രയും വേഗത്തില്‍ കൈമാറ്റം ചെയ്യപ്പെടാന്‍ സാധ്യമാകുന്നത്.

2019 മധ്യത്തോടെ 3.43.8 ഗിഗാ ഹേര്‍ട്‌സിലുള്ള 5 ജി സ്‌പെക്ട്രം കരസ്ഥമാക്കുന്നതിനും 2020 ആദ്യത്തില്‍ എം എം തരംഗ സ്‌പെക്ട്രം നേടുന്നതിനും സഊദി കമ്മ്യുണിക്കേഷന്‍ ആന്‍ഡ് ഇന്‍ഫര്‍മേഷന്‍ ടെക്‌നോളജ്ജി നിലവില്‍ നല്‍കിയിരിക്കുന്ന ടെസ്റ്റ്, ട്രയല്‍ ലൈസന്‍സ് മാറ്റി നല്‍കാനും പദ്ധതിയുണ്ട്.