തിരുവനന്തപുരം: മന്ത്രി സ്ഥാനം ഏറ്റെടുക്കാന്‍ താന്‍ തയാറാണെന്നും വകുപ്പ് മറ്റാര്‍ക്കും വിട്ടു നല്‍കില്ലെന്നും എന്‍.സി.പി എം.എല്‍.എയായ തോമസ് ചാണ്ടി. താന്‍ മന്ത്രിയാകുന്നതില്‍ മുഖ്യമന്ത്രിക്ക് എതിര്‍പ്പില്ല. ശശീന്ദ്രനെതിരായ ആരോപണത്തില്‍ ഗൂഢാലോചനയില്ലെന്നും
കുറ്റവിമുക്തനായാല്‍ ആ നിമിഷം ശശീന്ദ്രന് തിരിച്ചെത്താമെന്നും അദ്ദേഹം പറഞ്ഞു.

എ.കെ ശശീന്ദ്രന്‍ രാജിവച്ച ഒഴിവിലേക്ക് പകരം മന്ത്രിസ്ഥാനം നല്‍കുന്നതില്‍ ചര്‍ച്ച നടക്കുന്നതിനിടെയാണ് തോമസ് ചാണ്ടിയുടെ പ്രതികരണം. വിഷയം ചര്‍ച്ച ചെയ്യാന്‍ എന്‍.സി.പിയുടെ കേന്ദ്ര നേതൃയോഗം ഇന്ന് ഡല്‍ഹിയില്‍ ചേരുന്നുണ്ട്.

എന്‍.സി.പിക്ക് വീണ്ടും മന്ത്രി സ്ഥാനം നല്‍കുന്നതില്‍ സി.പി.എം കേന്ദ്ര നേതൃത്വത്തിന് അതൃപ്തിയുണ്ട്. ഗോവയില്‍ എന്‍.സി.പി ബി.ജെ.പിയെ പിന്തുണച്ചതാണ് കേന്ദ്ര നേതൃത്വത്തിന്റെ അതൃപ്തിക്ക് കാരണം.

ബി.ജെ.പിയുമായുള്ള എന്‍.സി.പിയുടെ നിലപാട് വ്യക്തമാക്കണമെന്നാണ് സി.പി.എമ്മിന്റെ ആവശ്യം. എന്‍.സി.പിയാണ് പുതിയ മന്ത്രിയെക്കുറിച്ച് തീരുമാനിക്കേണ്ടതെന്ന് ഇന്നലെ സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍ പറഞ്ഞിരുന്നു.