കൊണ്ടോട്ടി: നിപാ വൈറസ് ബാധയെ തുടര്‍ന്ന് കുവൈത്ത് വിമാനത്താവളത്തില്‍ യാത്രക്കാര്‍ പൂരിപ്പിച്ച് നല്‍കേണ്ട പ്രത്യേക മെഡിക്കല്‍ ഫോം വിതരണം ചെയ്ത് എയര്‍ഇന്ത്യ. കേരളത്തില്‍നിന്ന് കുവൈത്തില്‍ എത്തുന്ന യാത്രക്കാരെ വിമാനത്താവളത്തില്‍ തെര്‍മല്‍ സ്‌കാനിങ്ങിന് വിധേയമാക്കി തുടങ്ങിയതോടെയാണ് യാത്രക്കാര്‍ക്ക് ഫോം നല്‍കുന്നത്. കേരളത്തില്‍ നിന്ന് നേരിട്ടുള്ള വിമാനങ്ങളില്‍ വന്നിറങ്ങുന്നവര്‍ക്ക് വിമാനത്താവള കവാടത്തില്‍ ഡോക്ടറും നഴ്‌സും ഉള്‍പ്പെട്ട സംഘം പ്രത്യേക ഫോം നല്‍കിവരികയാണ്. കണക്ഷന്‍ വിമാനങ്ങളില്‍ എത്തുന്ന യാത്രക്കാര്‍ക്ക് ആവശ്യപ്പെടുന്ന പക്ഷം ക്ലിനിക്കില്‍ എത്തി ഫോം പൂരിപ്പിച്ചു നല്‍കിയാല്‍ മതി.
യാത്രക്കാരന്റെ ശരീരോഷ്മാവ് 37 സെല്‍ഷ്യസില്‍ കൂടുതലാണെന്ന് വിമാനത്താവളത്തിലെ തെര്‍മല്‍ സ്‌കാനര്‍ വഴി ക്ലിനിക്കില്‍ കണ്ടെത്തിയാല്‍ ഇവര്‍ നിര്‍ദേശിക്കപ്പെട്ട ക്ലിനിക്കിലേക്ക് മാറ്റും.