ജിദ്ദ: ദമ്മാമിലെ അബ്‌ഖൈഖ് ഫദലിയയില്‍ മലയാളി ഷോക്കേറ്റ്  മരിച്ചു. കൊല്ലം ജില്ലയിലെ അഞ്ചല്‍ പനംപട്ട സ്വദേശി പരപ്പാടിയില്‍ വീട്ടില്‍ ജെയിംസ് ജോണ്‍ (55) ആണ് മരിച്ചത്. ആരാംകോയുടെ സൈറ്റില്‍ മിനി സൂപ്പര്‍ മാര്‍ക്കറ്റ് നടത്തിവരുകയായിരുന്നു അദ്ദേഹം. ഞായറാഴ്ച രാത്രി കടയടച്ച് താമസ സ്ഥലത്തേക്ക് പോകാന്‍ ഇറങ്ങിയപ്പോള്‍ കടയോട് ചേര്‍ന്നുള്ള മെയിന്‍ സ്വിച്ച് ഓഫാക്കുന്നതിനിടെയാണ് ഷോക്കേറ്റത്. ഷീല ജെയിംസ് ആണ് ഭാര്യ. ശില്‍പ്പ, ആതിര എന്നിവര്‍ മക്കളാണ്. നിയമനടപടികള്‍ പൂര്‍ത്തിയാക്കി മൃതദേഹം നാട്ടില്‍ എത്തിക്കുമെന്ന് ബന്ധുക്കള്‍ അറിയിച്ചു