കുന്നംകുളം : ഇന്‍ഡോ- ശ്രീലങ്ക അന്താരാഷ്ട്ര യോഗ ചാംപ്യന്‍ഷിപ്പില്‍ കുന്നംകുളം സ്വദേശിനിയായ വിദ്യാര്‍ഥിനിക്ക് സ്വര്‍ണമെഡലോടെ ഒന്നാം സ്ഥാനം. ആര്‍ത്താറ്റ് ഹോളിക്രോസ് വിദ്യാലയത്തിലെ പ്ലസ്ടു വിദ്യാര്‍ഥിനി ചാട്ടുകുളം പനക്കല്‍ സാജന്‍ വര്‍ഗീസ്- നിസ ജോബി ദമ്പതികളുടെ മകള്‍ മറിയ സാറാ സാജനാണ് കൊളംബോയില്‍ നടന്ന അന്താരാഷ്ട്ര യോഗ ചാംപ്യന്‍ഷിപ്പില്‍ സ്വര്‍ണ മെഡല്‍ കരസ്ഥമാക്കിയത്. 27 നായിരുന്നു മത്സരം. ഓപ്പണ്‍ വിഭാഗത്തില്‍ 35 വയസുവരെയുള്ളവര്‍ക്കൊപ്പം മത്സരിച്ചാണു വിജയം കൈവരിച്ചത്.
ഇന്ത്യയില്‍ നിന്ന് 70 പേര്‍ പങ്കെടുത്ത മത്സരത്തില്‍ 10 പേര്‍ മലയാളികളാണ്. 10ാം വയസു മുതല്‍ യോഗ പരിശീലനം നടത്തുന്ന മറിയ നിരവധി ദേശീയ അന്തര്‍ദേശീയ മത്സരങ്ങളില്‍ സമ്മാനം നേടിയിട്ടുണ്ട്.