ആലപ്പുഴ/അരൂര്‍ : അറബിക്കടലില്‍ രൂപം കൊണ്ട ന്യൂനമര്‍ദ്ദത്തിന് ശമനമായില്ല. തീരം കവരുന്ന രീതിയില്‍ കനത്ത തിരയടി തുടരുകയാണ്. മേഖലയില്‍ നിന്ന് പലരും ജീവന്‍ ഭയന്ന് സുരക്ഷിത സ്ഥലങ്ങളിലേക്ക് മാറുകയാണ്.
ദുരിതാശ്വാസ ക്യാംപുകളില്‍ പലതും ജനങ്ങളെകൊണ്ട് നിറഞ്ഞിരിക്കുകയാണ്. കടല്‍ ഇരച്ചു കയറുന്നതിനൊപ്പം കനത്ത മഴയില്‍ നടപ്പാതകളും വെളളത്തിനടിയിലായിട്ടുണ്ട്.
തോരാതെ പെയ്യുന്ന മഴയില്‍ ജില്ലയുടെ താഴ്ന്ന പ്രദേശങ്ങള്‍ വെള്ളത്തിനടിയിലായിട്ടുണ്ട്. മാരാരിക്കുളം തെക്ക് പഞ്ചായത്ത് 23ാം വാര്‍ഡില്‍ കാട്ടൂര്‍ കോര്‍ത്തുശേരി ഭാഗത്ത് കടലാക്രമണം രൂക്ഷമായി.ഒരുവീടും സ്വകാര്യ റിസോര്‍ട്ടും കടലെടുത്തു. പത്തോളം വീടുകള്‍ കടലാക്രമണ ഭീഷണിയിലുമാണ്.
പുന്നയ്ക്കല്‍ ജോസഫ് മൈക്കിളിന്റെ വീടാണ് കടലെടുത്തത്. ഇയാളുടെ കോണ്‍ക്രീറ്റ് വീടും പന്ത്രണ്ട് സെന്റ് സ്ഥലവുമാണ് കടല്‍ കവര്‍ന്നത്. കിടപ്പാടം നഷ്ടപ്പെട്ട ഏഴംഗ കുടുംബം ദുരിതാശ്വാസ ക്യാംപില്‍ അഭയംതേടി.
പുന്നയ്ക്കല്‍ അല്‍ഫോണ്‍സിന്റെ വീട് ഏത് നേരവും കടലെടുക്കുമെന്ന സ്ഥിതിയിലാണ്. സമീപത്തെ മരങ്ങളും മണല്‍ചാക്കുകളും ഉപയോഗിച്ച് ഇവരുടെ വീട് സംരക്ഷിക്കാനുള്ള ശ്രമത്തിലാണ് പഞ്ചായത്തും നാട്ടുകാരും. ശാസ്താം പറമ്പില്‍ ജോയി,തൈയില്‍ ജോസഫ്, കുന്നേല്‍ ആന്റണി എന്നിവരുടെ വീടുകളും കടലാക്രമണ ഭീഷണിയിലാണ്. കടലില്‍ നിന്ന് 30 മീറ്ററോളം കരഭാഗം കടലെടുത്തു. കായ്ഫലമുളള ഒട്ടേറെ തെങ്ങുകളും മറ്റു വൃക്ഷങ്ങളും കടപുഴകി.
കടലാക്രമണം തുടങ്ങി മൂന്നു ദിവസം പിന്നിട്ടിട്ടും അധികൃതര്‍ തിരിഞ്ഞു നോക്കുന്നില്ലെന്നാരോപിച്ച് തീരദേശവാസികള്‍ ആലപ്പുഴ -ചേര്‍ത്തല തീരദേശപാത ഉപരോധിച്ചു.
ഉപരോധ സമരം ഒരു മണിക്കൂറോളം നീണ്ടു. വെളളം ഇരച്ചു കയറി റോഡ് തോടായതോടെ നാട്ടുകാരും വലഞ്ഞു. മഴവെള്ളം ഒഴുകി പോകുന്നതിനുള്ള മാര്‍ഗം കാണാതെ റോഡ് നിര്‍മിക്കുന്നതാണ് വെള്ളക്കെട്ട് ഉണ്ടാകാന്‍ കാരണമെന്ന് നാട്ടുകാര്‍ ആരോപിക്കുന്നു.
കാലവര്‍ഷം ശക്തിപ്പെടുന്നതോടെ കൂടുതല്‍ പ്രദേശത്തെ ഇടറോഡുകളില്‍ രൂക്ഷമായ വെള്ളക്കെട്ടിന് സാധ്യതയേറുകയാണ്. മഴക്കാലപൂര്‍വ രോഗ പ്രവര്‍ത്തനത്തിന്റെ മുന്നോടിയായുള്ള ശുചീകരണ പ്രവര്‍ത്തനവും ആരോഗ്യവകുപ്പ് ആരംഭിച്ചിട്ടില്ല.
ആവശ്യമായ ഫണ്ടും മറ്റു മരുന്നുകളും എത്താത്തതാണ് ശുചീകരണ പ്രവര്‍ത്തനം നീണ്ടു പോകാന്‍ കാരണം.