ന്യൂഡല്‍ഹി: മുന്‍ രാഷ്ട്രപതിയും കോണ്‍ഗ്രസ് നേതാവുമായ പ്രണബ് മുഖര്‍ജി ആര്‍.എസ്.എസ് പരിപാടിയില്‍ പങ്കെടുക്കുന്നത് സംബന്ധിച്ച് പ്രതികരിക്കാനില്ലെന്ന് കോണ്‍ഗ്രസ്. ഇത് സംബന്ധിച്ച് പ്രണബ് മുഖര്‍ജിയോട് തന്നെ ചോദിക്കൂവെന്നും ഒന്നും പ്രതികരിക്കാനില്ലെന്നും കോണ്‍ഗ്രസ് വക്താവ് ടോം വടക്കന്‍ പറഞ്ഞു. ആര്‍.എസ്.എസിന്റെയും കോണ്‍ഗ്രസിന്റെയും ഇടയില്‍ ആശയപരമായി വളരെയധികം വ്യത്യാസമുണ്ടെന്നും അദ്ദേഹം പറഞ്ഞു.
പുതുതായി റിക്രൂട്ട് ചെയ്ത 600 ആര്‍.എസ്.എസ് പ്രവര്‍ത്തകര്‍ക്കുള്ള ക്യാംപിലെ മുഖ്യാതിഥിയായിട്ടാണ് മുന്‍ രാഷ്ട്രപതി പങ്കെടുക്കുന്നത്. ക്ഷണം സ്വീകരിച്ച കാര്യം ആര്‍.എസ്.എസും കഴിഞ്ഞ ദിവസം സ്ഥിരീകരിച്ചിരുന്നു. നാഗ്പൂരിലെ പരിപാടിയില്‍ പങ്കെടുക്കാനുള്ള ക്ഷണം സ്വീകരിച്ച പ്രണബിന്റെ നടപടി നല്ല തുടക്കമാണെന്നും രാഷ്ട്രീയ തൊട്ടുകൂടായ്മ നല്ലതല്ലെന്നും കേന്ദ്രമന്ത്രി നിതിന്‍ ഗഡ്ഗരി പറഞ്ഞു.
ആര്‍.എസ്.എസ് രാജ്യത്തെ വര്‍ഗീയമായി ഭിന്നിപ്പിക്കുന്നുവെന്ന് കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി ഉള്‍പ്പെടെയുള്ള നേതൃത്വം നിരന്തരം ആരോപിക്കുന്നതിനിടെയാണ് ആര്‍.എസ്.എസ് ആസ്ഥാനത്തുള്ള പരിപാടിയില്‍ പ്രണബ് പങ്കെടുക്കുന്നത്.