കരുനാഗപ്പള്ളി: ആറാംക്ലാസുകാരിയെ കിടപ്പുമുറിയിലെ ജനല്‍ക്കമ്പിയില്‍ തൂങ്ങിമരിച്ച നിലയില്‍ കണ്ടെത്തിയ സംഭവത്തില്‍ ദുരൂഹത.
കുലശേഖരപുരം മാമ്പറ്റകിഴക്കതില്‍ പ്രസന്നന്‍-ഷൈല ദമ്പതികളുടെ മകള്‍ പ്രീതി(12)യെയാണ് ഇന്നലെ രാവിലെ മരിച്ച നിലയില്‍ കണ്ടത്. കുലശേഖരപുരം ഗവ. ഹയര്‍സെക്കന്‍ഡറി സ്‌കൂളിലെ ആറാം ക്ലാസ് വിദ്യാര്‍ഥിനിയാണ്. പരീക്ഷയായതിനാല്‍ തലേദിവസം രാത്രിയില്‍ത്തന്നെ മുറിയില്‍ കയറി കതകടച്ചിരുന്ന് പഠിക്കുകയായിരുന്നു കുട്ടിയെന്ന് വീട്ടുകാര്‍ പറഞ്ഞു.
ഇന്നലെ രാവിലെ മാതാവ് വിളിച്ചിട്ടും മുറിയില്‍ നിന്ന് പ്രതികരണമുണ്ടാകാഞ്ഞതിനെ തുടര്‍ന്ന് മൂത്തമകന്‍ പ്രവീണ്‍ വീടിന് പുറകുവശത്തെ ജനാല തുറന്ന് നോക്കിയപ്പോഴാണ് പെണ്‍കുട്ടിയെ തൂങ്ങി മരിച്ചനിലയില്‍ കണ്ടത്.
പ്രവീണിന്റെ നിലവിളികേട്ട് ഓടിക്കൂടിയവര്‍ മുറിയുടെ വാതില്‍ ചവിട്ടിപ്പൊളിച്ച് അകത്ത് കയറിയെങ്കിലും പെണ്‍കുട്ടി മരിച്ചെന്നറിഞ്ഞതോടെ പൊലിസില്‍ വിവരമറിയിക്കുകയായിരുന്നു.
മൃതദേഹത്തിന്റെ കാല്‍ മുട്ടുകള്‍ നിലത്തുകുത്തിയ നിലയിലായിരുന്നതിനാല്‍ മരണത്തില്‍ പൊലിസ് പ്രഥമദൃഷ്ട്യാ സംശയം പ്രകടിപ്പിച്ചു. തുടര്‍ന്ന് സിറ്റിപൊലിസ് കമ്മിഷണര്‍ ഡോ.സതീഷ് ബിനോ സ്ഥലത്തെത്തി. കൊല്ലത്തുനിന്നും ഫോറന്‍സിക് വിദഗ്ധരെത്തി തെളിവുകളും ശേഖരിച്ചു.
പൊലിസ് കമ്മിഷണറുടെ സാന്നിധ്യത്തില്‍ത്തന്നെ ഇന്‍ക്വസ്റ്റ് നടപടികള്‍ പൂര്‍ത്തിയാക്കി മൃതദേഹം തിരുവനന്തപുരം മെഡിക്കല്‍ കോളജിലേക്ക് പോസ്റ്റ്‌മോര്‍ട്ടത്തിനായി അയച്ചു. പെണ്‍കുട്ടി ഏറെനാളായി മാതാവിന്റെ സഹോദരിയുടെ വീട്ടില്‍ നിന്നാണ് പഠിച്ചിരുന്നത്. മരണത്തിന് തൊട്ടുമുന്‍പുള്ള ദിവസമാണ് കുട്ടി സ്വന്തം വീട്ടില്‍ തിരികെയെത്തിയത്.
പെണ്‍കുട്ടിയുടെ അടുത്ത ബന്ധുവിനെ ചുറ്റിപ്പറ്റിയാണ് പൊലിസിന്റെ അന്വേഷണം. സ്ഥിരം മദ്യപാനിയായതാണ് ഇയാളിലേക്ക് അന്വേഷണം നീളുന്നത്. സമീപത്തു താമസിക്കുന്ന മുത്തച്ഛന്‍ തലേദിവസം രാത്രി പലഹാരവുമായി വന്നു വിളിച്ചെങ്കിലും പഠിക്കാനുള്ളതിനാല്‍ കുട്ടി മുറിക്കു പുറത്തുവന്നില്ലെന്ന് സഹോദരന്‍ പ്രവീണ്‍ പൊലിസിനോടു പറഞ്ഞു.
പൊതുവേ ശാന്തസ്വഭാവമുള്ളതും മറ്റുള്ളവരോട് അധികം ഇടപഴകാത്തതുമായ സ്വഭാവക്കാരിയാണ് പെണ്‍കുട്ടിയെന്ന് സഹപാഠികള്‍ പറയുന്നു. പട്ടാളത്തില്‍ ജോലിയുള്ള പിതാവ് അവധിക്കെത്തിയശേഷം അടുത്തിടെയാണ് തിരികെപ്പോയത്. പിതാവ് എത്തിയശേഷം ഇന്ന് സംസ്‌കാരം നടക്കും.