എരുമപ്പെട്ടി: നീര്‍മാതളത്തിന്‍ കീഴില്‍ കലാകാരന്‍മാര്‍ ഒത്തുകൂടിയപ്പോള്‍ ക്യാന്‍വാസുകളില്‍ വിരിഞ്ഞത് ജീവന്‍ തുടിക്കുന്ന ചിത്രങ്ങള്‍.എരുമപ്പെട്ടി ത്രീ റോസസിന്റെ നേതൃത്വത്തിലാണ് എരുമപ്പെട്ടി ഗവ: ഹയര്‍ സെക്കന്‍ഡറി സ്‌കൂളില്‍ നീര്‍മാതളം എന്ന പേരില്‍ ചിത്രകലാ ക്യാംപ് സംഘടിപ്പിച്ചത്.
ചുമര്‍ ചിത്രകലയിലെ ഏഷ്യന്‍ റെക്കോര്‍ഡര്‍ അരുണ്‍ അരവിന്ദ് ഉള്‍പ്പടെയുള്ള കലാകാരന്‍മാര്‍ ചായ ചെപ്പില്‍ നിറങ്ങള്‍ ചാലിചപ്പോള്‍ കാന്‍വാസുകളില്‍ ജനിച്ചത് തുല്യതയില്ലാത്ത ഭാവനകളാണ്.
കലാകാരന്മാര്‍ക്ക് അവരുടെ കഴിവുകള്‍ പ്രദര്‍ശിപ്പിക്കുവാനും ആശയങ്ങള്‍ പങ്ക് വെച്ച് ചിത്രകലയിലെ അനന്ത സാധ്യതകളെ കുറിച്ച് പുതിയ അറിവുകള്‍ നേടുവാനും ക്യാംപില്‍ പങ്കെടുത്തവര്‍ക്ക് സാധിച്ചുവെന്ന് സംഘാടക ധന്യമനോജ് പറഞ്ഞു.
ചിത്രകലാ ക്യാംപില്‍ വേറിട്ട അനുഭവമായത് ഇരട്ട സഹോദരിമാരുടെ ചിത്ര രചനയാണ്.വടക്കാഞ്ചേരി പാര്‍ലിക്കാട് മുല്ലക്കപറമ്പില്‍ അലി, ഷെമീജ എന്നിവരുടെ മക്കളായ അസ്‌ന, തസ്‌നി എന്നിവരാണ് വര്‍ണങ്ങള്‍ കൊണ്ട് വിസ്മയം തീര്‍ത്തത്. പ്ലസ് ടൂ വിദ്യാര്‍ഥികളായ ഇവര്‍ ജനനം പോലെ തന്നെ ഓരോ കാന്‍വാസിലും ഒരുമിച്ചാണ് ഭാവനകള്‍ക്ക് നിറങ്ങള്‍ നല്‍കിയത്.
ചിത്രരചനയില്‍ സംസ്ഥാനതലം ഉള്‍പ്പടെ നിരവധി സമ്മാനങ്ങള്‍ കരസ്ഥമാക്കിയ സഹോദരിമാര്‍ ആദ്യമായാണ് അക്കര്‍ലിക്ക് വര്‍ണത്തില്‍ വരയ്ക്കുന്നത്. അതുപോലെ തന്നെ ക്യാംപില്‍ ജീവന്‍കൊണ്ട മികവുറ്റ സൃഷ്ടികള്‍ ഓരോ കലാകാരന്റേയും രചനാ വൈഭവം വിളിച്ചോതുന്നവയായിരുന്നു. കുട്ടികളുടെ കഴിവുകള്‍ കണ്ടെത്തി പ്രോത്സാഹിപ്പിക്കുന്നതിനായി ചിത്ര രചന മത്സരവും ഒരുക്കിയിരുന്നു. പ്രശസ്ത ചിത്രകലാകാരനും ശില്‍പിയും കാലടി സംസ്‌കൃത സര്‍വകലാശാല അസി. പ്രഫസറുമായ ഡോ.ടി.ജി ജ്യോതിലാല്‍ ക്യാംപില്‍ പങ്കെടുത്ത് അഭിപ്രായങ്ങള്‍ പങ്ക് വെച്ചത് കലാകാര്‍ക്ക് വലിയ പ്രോത്സാഹനമായി മാറി.ചിത്രകലാ ക്യാമ്പിന് സംഘാടകരായ എന്‍.പി.ശ്രീകുമാര്‍, ധന്യ മനോജ്, ബാബുരാജ്,എം.എസ്.രാമകൃഷ്ണന്‍ മാസ്റ്റര്‍, ഹേമ ശശികുമാര്‍, ഡോ.സുലേഖ അബ്ദുള്‍ അസീസ് നേതൃത്വം നല്‍കി.