വാടാനപ്പള്ളി: ആംബുലന്‍സിന്റെ മാതൃകയിലാക്കിയ വാഹനങ്ങളും ഇതരസംസ്ഥാനങ്ങളില്‍ നിന്നുള്ള ചരക്ക് ലോറികളും കേരളത്തിലേക്കുള്ള കഞ്ചാവ് ലഹരി വസ്തുക്കളുടെ വിപണന മാര്‍ഗങ്ങളാകുന്നു.
പാലക്കാട് കോടതി പരിസരത്ത് നിന്ന് വലപ്പാട് പൊലിസ് പിടികൂടിയ ചാവക്കാട് അകലാട് മൂന്നേനി സ്വദേശി നെയ്യൂരാന്‍ ഷറഫു എന്ന അഷ്‌റഫില്‍ നിന്നാണ് ലഹരി മാഫിയാ സംഘത്തിന്റെ പുതിയ വിപണന തന്ത്രങ്ങളെകുറിച്ച് പൊലിസിന് വിവരം ലഭിക്കുന്നത്. കഞ്ചാവിനൊപ്പം മദ്യവും മറ്റ് ലഹരി വസ്തുക്കളും കേരളത്തിലെത്തിക്കാന്‍ ലഹരി മാഫിയാ സംഘം നൂതന മാര്‍ഗങ്ങള്‍ ഉപയോഗിക്കുന്നതായാണ് കണ്ടെത്തല്‍. വാടകക്കെടുത്ത വാഹനങ്ങളില്‍ കൃത്രിമ അറകള്‍ നിര്‍മിച്ചും വാഹനങ്ങള്‍ ആംബുലന്‍സിന്റെ മാതൃകയില്‍ വ്യാജമായി നിര്‍മ്മിച്ചുമാണ് ലഹരി മാഫിയാ സംഘം ഈരംഗത്ത് പിടിമുറുക്കിയിരിക്കുന്നത്.
2015ല്‍ 10 കിലോ കഞ്ചാവുമായി ഷൊര്‍ണൂര്‍ പൊലിസും 2016ല്‍ എട്ട് കിലോ കഞ്ചാവുമായി പാലക്കാട് ഹേമാംബിക പൊലിസും അഷ്‌റഫിനെ പിടികൂടിയിരുന്നു. ഇതര സംസ്ഥാനങ്ങളില്‍ നിന്ന് അരിയും സവാളയും കയറ്റി വരുന്ന ലോറികളിലാണ് കഞ്ചാവ് ഉള്‍പ്പടേയുള്ള ലഹരി വസ്തുക്കള്‍ കടത്തുന്നത്. വളം കൊണ്ടുവരുന്നവണ്ടിയില്‍ കഞ്ചാവ് കടത്തുകയാണെങ്കില്‍ വളത്തിന്റെ രൂക്ഷഗന്ധം മൂലം കഞ്ചാവിന്റെ മണം തിരിച്ചറിയില്ലെന്ന പഴുതും ഉപയോഗിക്കുന്നു. ചെക്ക് പോസ്റ്റിലെ പരിശോധനയ്‌ക്കൊപ്പം മറ്റ് പ്രധാന കേന്ദ്രങ്ങളിലെ തടസ്സങ്ങളും ഒഴിവാക്കാന്‍ വ്യാജമായി നിര്‍മിച്ച ആംബുലന്‍സിലൂടെയുള്ള ലഹരി വസ്തുക്കളുടെ വിപണനത്തെയും ഇവര്‍ ആയുധമാക്കി. അറസ്റ്റിലായ നെയ്യൂരാന്‍ ഷറഫു എന്ന അഷ്‌റഫിന്റെ സംഘത്തിലുള്ളവരില്‍ ഏറെപേരും ഇയാളുടെ കഞ്ചാവ് വിപണന രംഗത്തെ കൂട്ടാളികളാണ്. അകലാട് മേഖലയില്‍ ഓടിക്കൊണ്ടിരിക്കുന്ന ചരക്ക് ലോറികളില്‍ നിന്ന് കഞ്ചാവ് ഉള്‍പ്പെടെയുള്ള മയക്കുമരുന്നുകളുടെ കെട്ടുകള്‍ റോഡരികിലേക്ക് എറിഞ്ഞുകൊടുക്കുകയാണ് മാഫിയാ സംഘത്തിന്റെ രീതി.
വഴിയില്‍ കാത്തു നില്‍ക്കുന്ന സംഘാംഗങ്ങള്‍ കഞ്ചാവ് ഉടന്‍ എടുത്തുമാറ്റുകയും സുരക്ഷിത സ്ഥലങ്ങളിലേക്ക് മാറ്റി വിപണനം നടത്തുകയും ചെയ്യും. അകലാട് മേഖലയില്‍ ഏക്കര്‍ കണക്കിന് വിസ്തൃതിയുള്ള രാമച്ചം പാടങ്ങളും കഞ്ചാവ് ലഹരി മാഫിയാ സംഘത്തിന്റെ് ഒളിസങ്കേതങ്ങളാണ്. രാമച്ചം പാടങ്ങളില്‍ കുഴിച്ചിടുന്ന കഞ്ചാവ് ആവശ്യക്കാര്‍ക്ക് അപ്പപ്പോള്‍ വിതരണം ചെയ്യും.