എരുമപ്പെട്ടി: വെള്ളറക്കാട് കൊല്ലം പടിയില്‍ ബസും ബൈക്കും കൂട്ടിയിടിച്ച് എന്‍ജിനീയറിങ് വിദ്യാര്‍ഥികള്‍ക്ക് പരുക്കേറ്റു. ഗുരുവായൂര്‍ മാന്നൂര്‍ വീട്ടില്‍ അക്ഷയ് (20), കണ്ടാണശ്ശേരി നാലകത്ത് ഇര്‍ഫാന്‍ (20) എന്നിവര്‍ക്കാണ് പരുക്കേറ്റത്. വൈകീട്ട് 6.30 യോടെയാണ് അപകടം നടന്നത്. വെള്ളറക്കാട് തേജസ് എന്‍ജിനീയറിങ് കോളജിനു മുന്നില്‍ വെച്ചാണ് അപകടം സംഭവിച്ചത്. ഇതേ കോളജില്‍ നിന്നും പഠനം കഴിഞ്ഞ് വീട്ടിലേക്ക് മടങ്ങുകയായിരുന്ന വിദ്യാര്‍ഥികള്‍ സഞ്ചരിച്ചിരുന്ന ബൈക്കിനു പുറകില്‍ സ്വകാര്യ ബസ് ഇടിക്കുകയായിരുന്നു.
ബൈക്കിന് പുറകിലിരുന്ന ഇര്‍ഫാന് നട്ടെല്ലിന് സാരമായി പരുക്കേറ്റിട്ടുണ്ട്. ഇവരെ എരുമപ്പെട്ടി ആക്ട്‌സ് പ്രവര്‍ത്തകര്‍ കുന്നംകുളത്തുള്ള സ്വകാര്യ ആശുപത്രിയില്‍ പ്രേവേശിപ്പിച്ചു.