പാരിസ്: ചൈനക്കാരനെ പൊലിസ് കൊലപ്പെടുത്തിയ സംഭവത്തെ തുടര്‍ന്ന് പാരിസില്‍ സംഘര്‍ഷം. സംഭവത്തില്‍ മൂന്നു പൊലിസുകാര്‍ക്ക് പരുക്കേറ്റു. 30 പേരെ കസ്റ്റഡിയിലെടുത്തിട്ടുണ്ട്. കഴിഞ്ഞ ദിവസം കൊല്ലപ്പെട്ട ചൈനക്കാരന് ആദരാഞ്ജലി അര്‍പ്പിക്കാന്‍ നിരവധി പേര്‍ പൊലിസ് സ്റ്റേഷന് സമീപമെത്തിയിരുന്നു.
കത്രിക കൊണ്ട് പൊലിസുകാരനെ ആക്രമിച്ചതിനെ തുടര്‍ന്നാണ് ലീ ഷായോ എന്ന ചൈനക്കാരനെ പൊലിസ് കൊലപ്പെടുത്തിയത്. എന്നാല്‍, ലീയുടെ കുടുംബം ആരോപണങ്ങള്‍ നിഷേധിച്ചു. സംഭവത്തില്‍ ചൈന ഫ്രാന്‍സിനെ പ്രതിഷേധമറിയിച്ചിട്ടുണ്ട്. ലീയുടെ കുടുംബത്തിലെ തര്‍ക്കംതീര്‍ക്കാനെത്തിയ പൊലിസിനെ ഇയാള്‍ മൂര്‍ച്ചയേറിയ ആയുധം കൊണ്ട് കുത്തിയെന്നും ബുള്ളറ്റ് പ്രൂഫ് ധരിച്ചതിനാല്‍ മുറിവേല്‍ക്കാതെ പൊലിസുകാരന്‍ രക്ഷപ്പെടുകയായിരുന്നെന്നും പൊലിസ് പറഞ്ഞു.
കുറ്റക്കാര്‍ക്കെതിരേ ഏത്രയും വേഗം നടപടിയെടുക്കണമെന്നും ചൈനക്കാരുടെ സുരക്ഷ ഉറപ്പാക്കണമെന്നും ചൈനീസ് വിദേശകാര്യ മന്ത്രാലയം ആവശ്യപ്പെട്ടു.