തൃശൂര്‍: അതിരപ്പിള്ളി ജലവൈദ്യുതി പദ്ധതിക്കെതിരേ ജില്ലാ കോണ്‍ഗ്രസ് കമ്മിറ്റിയുടെ നേതൃത്വത്തില്‍ ആദിവാസി കൂട്ടായ്മ സംഘടിപ്പിക്കുന്നു. വാഴച്ചാല്‍ ആദിവാസി കോളനി പരിസരത്ത് 31ന് രാവിലെ 10ന് നടത്തുന്ന കൂട്ടായ്മ നടന്‍ ശ്രീനിവാസന്‍ ഉദ്ഘാടനം ചെയ്യും. ആദിവാസി സമൂഹത്തിലെ നേതാക്കളും പരിസ്ഥിതി, പൊതു പ്രവര്‍ത്തകരും കൂട്ടായ്മയില്‍ പങ്കെടുക്കുമെന്ന് ഡി.സി.സി പ്രസിഡന്റ് ടി.എന്‍ പ്രതാപന്‍ പറഞ്ഞു.
സമവായത്തിലൂടെ മാത്രമേ അതിരപ്പിള്ളി പദ്ധതി നടപ്പാക്കൂവെന്ന് വൈദ്യുതി മന്ത്രി എം.എം മണി പറയുന്നുണ്ടെങ്കിലും നടപ്പാക്കാനുള്ള നീക്കങ്ങള്‍ ആരംഭിച്ചിരിക്കുകയാണ്. പദ്ധതിയുടെ ഭാഗമായി അതിരപ്പിള്ളിയില്‍ ഭൂമി അളക്കുകയും മരങ്ങള്‍ മാര്‍ക്ക് ചെയ്യുകയും ചെയ്തുതുടങ്ങിയിട്ടുണ്ട്. യു.ഡി.എഫ് സര്‍ക്കാരിന്റെ കാലത്തും പദ്ധതിയെ തങ്ങള്‍ എതിര്‍ത്തിരുന്നു.
സി.പി.ഐ പദ്ധതിക്കെതിരാണെങ്കിലും വേണ്ടത്ര പ്രതിരോധം നടത്താനാകുന്നില്ല. ഒരു ഭാഗത്ത് പരിസ്ഥിതിക്കുവേണ്ടി വാദിക്കുകയും മറുവശത്ത് കാടും പുഴയും നശിപ്പിക്കാന്‍ കൂട്ടുനില്‍ക്കുകയും ചെയ്യുന്ന സി.പി.എമ്മിന്റെ നിലപാട് ജനങ്ങളോടുള്ള വെല്ലുവിളിയാണെന്നും അദ്ദേഹം പറഞ്ഞു.
വാര്‍ത്താസമ്മേളനത്തില്‍ ഡി.സി.സി വൈസ് പ്രസിഡന്റുമാരായ ജോസഫ് ടാജറ്റ്, ജോസ് വള്ളൂര്‍, പരിയാരം ബ്ലോക്ക് കോണ്‍ഗ്രസ് പ്രസിഡന്റ് ബിജു പി കാവുങ്ങല്‍, അതിരപ്പിള്ളി മണ്ഡലം കോണ്‍ഗ്രസ് പ്രസിഡന്റ് ജോസ് പാറയ്ക്ക എന്നിവരും പങ്കെടുത്തു.