കുന്ദമംഗലം: മെഡി. കോളജ്-കാരന്തൂര്‍ റോഡില്‍ അപകടം തുടര്‍ക്കഥയാകുന്നു. ഇന്നലെ ഈ റോഡില്‍ രണ്ട് അപകടങ്ങളാണ് നടന്നത്.
മുണ്ടിക്കല്‍താഴം വയല്‍ സ്റ്റോപ്പില്‍ കെ.എസ്.ആര്‍.ടി.സി ബസും സ്വകാര്യ ബസും കൂട്ടിയിടിച്ചുണ്ടായ അപകടത്തില്‍ സ്വകാര്യ ബസ് ഡ്രൈവര്‍ക്ക് പരുക്കേറ്റു. മാനന്തവാടിയില്‍നിന്ന് കോഴിക്കോട്ടേക്ക് പോകുകയായിരുന്ന കെ.എസ്.ആര്‍.ടി.സി ബസും കോഴിക്കോടുനിന്ന് മുക്കം ഭാഗത്തേക്ക് പോകുകയായിരുന്ന സ്വകാര്യ ബസുമാണ് അപകടത്തില്‍പ്പെട്ടത്. സ്വകാര്യബസ് വൈദ്യുതിത്തൂണില്‍ ഇടിച്ചുനിന്നതിനാല്‍ വന്‍ അപകടം ഒഴിവായി. ഇതിന് തൊട്ടടുത്ത് വൈകിട്ട് നിയന്ത്രണംവിട്ട കാര്‍ ബസിലിടിച്ച് വീണ്ടും അപകടമുണ്ടായി.
റോഡ് ബി.എം.സി ടാറിങ് ചെയ്ത് നവീകരിച്ചതോടെയാണ് അപകടം വര്‍ധിച്ചത്. റോഡ് നവീകരിച്ചതിന് ശേഷം കഴിഞ്ഞ രണ്ടു മാസത്തിനുള്ളില്‍ ചെറുതും വലുതുമായ പത്തിലധികം അപകടങ്ങളാണ് റോഡില്‍ ഉണ്ടായത്. സി.ഡബ്ല്യു.ആര്‍.ഡി.എം പനാത്ത്താഴം ബൈപാസ് തുറന്നതോടെ ഈ റോഡില്‍ തിരക്ക് വര്‍ധിച്ചതും വാഹനങ്ങളുടെ അമിതവേഗവും അപകടത്തിന് കാരണമാകുന്നു.
റോഡില്‍ അപകടം വര്‍ധിച്ചതോടെ മോട്ടോര്‍ വാഹന വകുപ്പും പൊലിസും റോഡില്‍ പരിശോധന ശക്തമാക്കിയിരുന്നു. മാനന്തവാടിയില്‍ കോഴിക്കോട്ടേക്ക് പോകുകയായിരുന്ന കെ.എസ്.ആര്‍.ടി.സി ബസും കോഴിക്കോടുനിന്ന് മുക്കം ഭാഗത്തേക്ക് പോകുകയായിരുന്ന സ്വകാര്യ ബസുമാണ് അപകടത്തില്‍പ്പെട്ടത്. ഇവിടെ കഴിഞ്ഞദിവസം ഓട്ടോയില്‍ ബൈക്കിടിച്ച് വടകര സ്വദേശിയായ ചാത്തമംഗലം ഐ.ടി.ഐയിലെ വിദ്യാര്‍ഥി മരിച്ചിരുന്നു.
ഇയാളുടെ കൂടെ യാത്ര ചെയ്ത സുഹൃത്ത് ഇപ്പോഴും ഗുരുതരാവസ്ഥയില്‍ ആശുപത്രിയിലാണ്. ഒരു മാസം മുന്‍പ് കാരന്തൂര്‍ സ്വദേശിയായ രണ്ടു യുവാക്കള്‍ ഈ റോഡില്‍ കൊളായ്താഴത്ത് വച്ച് മരിച്ചിരുന്നു.
സദാസമയവും ആംബുലന്‍സ് അടക്കമുള്ള വാഹനങ്ങള്‍ മെഡിക്കല്‍ കോളജ് ആശുപത്രിയിലേക്ക് കടന്നുപോകുന്ന റോഡിന് വേണ്ടത്ര വീതിയില്ലാത്തതും അപകടത്തിന് കാരണമാകുന്നു. അപകടം പതിവായതോടെ റോഡില്‍ സ്പീഡ് ബ്രേക്കര്‍ സ്ഥാപിക്കണമെന്ന ആവശ്യം ഉയര്‍ന്നിട്ടുണ്ട്.