കോട്ടയം: കെവിന്റെ കൊലപാതകത്തില്‍ കൂടുതല്‍ വെളിപ്പെടുത്തലുകളുമായി ബന്ധു അനീഷിന്റെ വെളിപ്പെടുത്തല്‍. കെവിനെ അവസാനമായി കാണുമ്പോള്‍ ഓടി രക്ഷപ്പെടാന്‍ കഴിയുന്ന അവസ്ഥയിലായിരുന്നില്ലെന്ന് അനീഷ് പറഞ്ഞു. തനിക്ക് ഛര്‍ദ്ദിക്കാനായി വാഹനം നിര്‍ത്തിയപ്പോളാണ് കെവിനെ അവസാനമായി കാണുന്നത്. അപ്പോള്‍ അവര്‍ കെവിനെ വാഹനത്തില്‍ നിന്ന് ഇറക്കി റോഡില്‍കിടത്തുന്നത് കണ്ടു. ഉടനെ താന്‍ അബോധാവസ്ഥയിലായി.

മര്‍ദ്ദനമേറ്റ് പൂര്‍ണമായും തളര്‍ന്ന കെവിന്‍ ഇറങ്ങിയോടിയെന്ന് പറയുന്നത് വിശ്വസിക്കാനാവുന്നില്ലെന്നും അനീഷ് മാധ്യമങ്ങളോട് പറഞ്ഞു.

ഏകദേശം പുലര്‍ച്ചെ നാലു മണിയോടെയാണ് കെവിനെ കാറില്‍ നിന്നും ഇറക്കിക്കിടത്തുന്നത് കണ്ടത്. രാവിലെ ആറുമണിയ്ക്ക് ശേഷം പ്രതികള്‍ തിരിച്ചെത്തിയ ശേഷമാണ് കെവിന്‍ ഓടിപ്പോയകാര്യം പറയുന്നതെന്നും അനീഷ് ചൂണ്ടിക്കാട്ടി.

അതേസമയം, കെവിനെ സാനുവും സംഘവും തട്ടിക്കൊണ്ടുപോയത് പൊലിസിന്റെ അറിവോടെയാണെന്ന് അനീഷ് നേരത്തെ വെളിപ്പെടുത്തിയിരുന്നു. തങ്ങളെ തട്ടിക്കൊണ്ട് പോകുന്ന സമയത്ത് മുഖ്യപ്രതി സാനുചാക്കോയുടെ ഫോണിലേക്ക് സ്ഥലം എസ്.ഐ രണ്ട് മൂന്ന് തവണ വിളിച്ചിരുന്നു.

തലേദിവസം രാത്രി പട്രോളിംഗിനിടെ സാനുവിനെ എസ്.ഐ ചോദ്യം ചെയ്തിരുന്നു. അപ്പോള്‍ എസ്.ഐക്ക് 10000 രൂപ നല്‍കിയെന്ന് ഷാനു പറഞ്ഞതായും അനീഷ് പറയുന്നു.

പ്രതികള്‍ വീടാക്രമിക്കുന്ന സമയത്ത് 100 മീറ്റര്‍ അപ്പുറത്ത് എസ്.ഐ ഉണ്ടായിരുന്നതായും അനീഷ് വെളിപ്പെടുത്തി.