തളിപ്പറമ്പ്: നിയന്ത്രണംവിട്ട സ്വകാര്യ കാര്‍ റോഡില്‍നിന്നു തെറിച്ച് പത്തടിയോളം ദൂരെ റോഡരികിലെ പറമ്പിലേക്ക് മറിഞ്ഞ് നാലുപേര്‍ക്ക് പരിക്ക്. ഇന്നു പുലര്‍ച്ചെ ഒന്നരയോടെ ധര്‍മശാല-പറശിനിക്കടവ് റോഡില്‍ തവളപ്പാറയില്‍ അമ്മയും കുഞ്ഞും ആശുപത്രിക്ക് സമീപമാണ് അപകടം നടന്നത്. കനത്ത മഴയായിരുന്നതിനാല്‍ പരിസരവാസികള്‍ അപകടം അറിഞ്ഞിരുന്നില്ല. അതുവഴി പോവുകയായിരുന്ന ഓട്ടോറിക്ഷാ ഡ്രൈവറാണ് അപകടം ആദ്യം കണ്ടത്. ഇയാള്‍ വിവരമറിയിച്ചതിനെത്തുടര്‍ന്ന് പൊലിസും നാട്ടുകാരും പരിക്കേറ്റവരെ പുറത്തെടുത്ത് ആശുപത്രിയിലെത്തിച്ചു. പറശിക്കടവ് ക്ഷേത്രത്തിലേക്ക് പോവുകയായിരുന്ന തലശ്ശേരി ധര്‍മ്മടം അണ്ടലൂര്‍ സ്വദേശികളാണ് അപകടത്തില്‍പെട്ടത്. പരിക്കേറ്റ വാഴയില്‍ വീട്ടില്‍ സഞ്ജീവ്(23), കുനിമ്മല്‍ ഹൗസില്‍ വി നിജില്‍(21), സ്മൃതി ഹൗസില്‍ അനൂപ്(23), പുത്തന്‍പുരയില്‍ ഷൈനേഷ്(21) എന്നിവരെ പരിയാരം മെഡിക്കല്‍ കോളജില്‍ പ്രവേശിപ്പിച്ചു.