പൊന്നാനി: കുടിവെള്ളക്ഷാമം  മൂലം ദുരിതമനുഭവിക്കുന്ന പുതുപൊന്നാനി തീരദേശ മേഖലയിലേക്ക് യുവാക്കളുടെ നേതൃത്വത്തില്‍  കുടിവെള്ളമെത്തിച്ചു.
 സെലസ് ബ്രദേഴ്‌സ് പ്രവര്‍ത്തകരാണ് കുടിവെള്ള വിതരണം നടത്തിയത്. വേനല്‍  കനത്തതോടെ ഉപ്പുവെള്ളം മാത്രമാണ് പുതുപൊന്നാനി തീരദേശ മേഖലയില്‍ ലഭിക്കുന്നത്.  പൊതുവിതരണ ടാപ്പില്‍ നിന്ന് ചെളിവെള്ളം മാത്രം ലഭിക്കുന്നതിനാല്‍ കുടിവെള്ളത്തിനായി  നൂറുകണക്കിന് കുടുംബങ്ങള്‍ പ്രയാസം നേരിടുകയാണ്.
നേരത്തെ വേനല്‍ക്കാലത്തും മേഖലയിലെ  കിണറുകളില്‍ ശുദ്ധജലമാണ് ലഭിച്ചിരുന്നത്. എന്നാല്‍ കഴിഞ്ഞ ഏതാരം വര്‍ഷങ്ങളായി കിണറുകളില്‍ ഉപ്പു  ജലമായതോടെ കുടിവെള്ളം കിട്ടാക്കനിയായി മാറിയിരിക്കുകയാണ്. ഈ സാഹചര്യത്തിലാണ്  പുതുപൊന്നാനിയിലെ സന്നദ്ധ സംഘടനയായ സെലസ് ബ്രദേഴ്‌സ് ശുദ്ധജലമെത്തിച്ചു നല്‍കുന്നത്.
1200  ലിറ്റര്‍ സംഭരണ ശേഷിയുള്ള രണ്ടു ടാങ്കുകളിലായാണ് കുടിവെള്ളം വിതരണം ചെയ്തത്. സെലസ്  ബ്രദേഴ്‌സ് പ്രവര്‍ത്തകരായ പി.വി  ദര്‍വേശ്, റിയാസ്, പി.പിഅഫ്‌സല്‍, പി.പി മുഖ്താര്‍,  കെ.മുജീബ്, മുഫീദ് ,പി  ടി. നി സാം എന്നിവര്‍ കുടിവെള്ള വിതരണത്തിന് നേതൃത്വം നല്‍കി.