മനാമ: ബഹ്‌റൈനില്‍ വിദേശികള്‍ക്ക് 10 വര്‍ഷത്തെ താമസാനുമതി നല്‍കുമെന്ന് റിപ്പോര്‍ട്ട്. ബഹ്‌റൈനിലുള്ള വിദേശികള്‍ക്ക് സ്വന്തം സ്‌പോണ്‍സര്‍ഷിപ്പില്‍ 10 വര്‍ഷം താമസിക്കാനുള്ള അനുമതിയാണ് നല്‍കുകയെന്ന് അധികൃതരെ ഉദ്ധരിച്ച് ഗള്‍ഫ് ന്യൂസ് ആണ് റിപ്പോര്‍ട്ട് ചെയ്തത്.
ബഹ്‌റൈന്‍ കിരീടാവകാശി സല്‍മാന്‍ ബിന്‍ ഹമദ് അല്‍ ഖലീഫ രാജകുമാരനാണ് ഇതുസംബന്ധിച്ച കരടു നിര്‍ദ്ദേശം ആഭ്യന്തര മന്ത്രാലയത്തിന് നല്‍കിയതെന്നാണ് റിപ്പോര്‍ട്ട്.
കൂടാതെ പുതിയ പരിഷ്‌കാരത്തിന് ആവശ്യമായ നിയമങ്ങളും ചട്ടങ്ങളും രൂപീകരിക്കണമെന്ന് രാജകുമാരന്‍ നിര്‍ദ്ദേശിച്ചതായും റിപ്പോര്‍ട്ടിലുണ്ട്.

അതേ സമയം വിദേശനിക്ഷേപം ആകര്‍ഷിക്കുന്നതിന്റെ ഭാഗമായി ബഹ്‌റൈനിലെ വിദേശികളായ നിക്ഷേപകര്‍ക്കാണ് ആദ്യ ഘട്ടത്തില്‍ ഈ അനുമതി ലഭിക്കുകയെന്നാണ് റിപ്പോര്‍ട്ട് നല്‍കുന്ന സൂചന.
പുതിയ സംവിധാനം വരുന്നതോടെ നിക്ഷേപകരുടെ കേന്ദ്രമായി ബഹ്‌റൈന്‍ മാറുമെന്നാണ് പ്രതീക്ഷിക്കുന്നത്.
ഒരാഴ്ച മുന്പ് സമാനമായ നിര്‍ദേശം യു.എ.ഇയും പുറപ്പെടുവിച്ചിരുന്നു. രാജ്യത്തെ സ്‌പെഷ്യലിസ്റ്റ് ഡോക്ടര്‍മാര്ക്കും എഞ്ചിനീയര്‍മാര്‍ക്കും അവരുടെ കുടുംബാംഗങ്ങള്‍ക്കും 10 വര്‍ഷത്തെ താമസ വിസ അനുവദിക്കാനായിരുന്നു യു.എ.ഇ മന്ത്രിസഭയുടെ തീരുമാനം.
.