താനൂര്‍: നോമ്പുതുറ സമയത്തു വൈദ്യുതി മുടങ്ങുന്നതു ജനങ്ങളെ ദുരിതത്തിലാക്കുന്നു. കെ. എസ്. ഇ. ബി താനൂര്‍ ഈസ്റ്റ് സെക്ഷനിലെ കുടുംബങ്ങളാണ് ഏറെ ദുരിതത്തിലാവുന്നത്. കാട്ടിലങ്ങാടി പ്രദേശത്തുകാര്‍ക്കു പിന്നാലെ കുന്നുംപുറം ഭാഗങ്ങളിലുള്ളവരും കെ. എസ്. ഇ. ബി ക്കെതിരേ വൈദ്യുതി മുടങ്ങുന്നുവെന്ന പരാതിയുമായി രംഗത്തെത്തി. മിക്ക ദിവസങ്ങളിലും നോമ്പുതുറ സമയമായാല്‍ വൈദ്യുതി മുടങ്ങാറുണ്ടെന്നും പിന്നെ അടുത്ത ദിവസമാണു വൈദ്യുതി വരുന്നതെന്നും ഇവര്‍ പരാതിപ്പെട്ടു. കെ. എസ്. ഇ. ബി താനൂര്‍ സെക്ഷനെ വിഭജിച്ച് ഈസ്റ്റ് സെക്ഷനാക്കിയതോടെ കിഴക്കന്‍ മേഖലയിലുള്ളവര്‍ക്കു വൈദ്യുതി കിട്ടാകനിയാവുകയാണ്. പരാതി വര്‍ധിച്ച സാഹചര്യത്തില്‍ ബഹുജന പ്രക്ഷോഭം നടത്തുമെന്നു വിവിധ സംഘടനകള്‍ അറിയിച്ചു.