മനാമ: ബഹ്‌റൈനില്‍ നടപ്പിലായ ഹെല്‍ത്ത് ഇന്‍ഷൂറന്‍സ് പദ്ധതിയുടെ പേരില്‍ പൊതു ജനങ്ങള്‍ക്ക് അധിക ഭാരം പേറേണ്ടി വരുമെന്ന രീതിയില്‍ കഴിഞ്ഞ ദിവസം ചില പ്രദേശിക പത്രങ്ങളില്‍ വന്ന വാര്‍ത്തകള്‍ അധികൃതര്‍ നിഷേധിച്ചു. പൊതുജനങ്ങള്‍ക്കുള്ള ഹെല്‍ത്ത് ഇന്‍ഷൂറന്‍സ് പദ്ധതിയുടെ ചിലവ് സര്‍ക്കാര്‍ തന്നെ വഹിക്കുമെന്നും മറിച്ചുള്ള മാധ്യമ വാര്‍ത്തകളെല്ലാം അടിസ്ഥാന രഹിതമാണെന്നും സുപ്രീം ഹെല്‍ത്ത് കൗണ്‍സില്‍ (എസ്.സി.എച്ച്) പ്രസിഡന്റ് ലഫ്. ജനറല്‍ ഡോ. ഷെയ്ഖ് മുഹമ്മദ് ബിന്‍ അബ്ദുള്ള അല്‍ ഖലീഫ പ്രത്യേക സര്‍ക്കുലറില്‍ വ്യക്തമാക്കി.
ബഹ്‌റൈന്‍ രാജാവ് ഹമദ് ബിന്‍ ഇസാ അല്‍ ഖലീഫയുടെ നിര്‍ദ്ദേശപ്പ്രകാരം രാജ്യത്തെ പൊതുജനങ്ങളുടെ വിവിധ ആരോഗ്യപ്രശ്‌നങ്ങള്‍ക്കായി വിഭാവനം ചെയ്തതാണ് ഹെല്‍ത്ത് ഇന്‍ഷൂറന്‍സ് പദ്ധതി. ആയതിനാല്‍ ഈ പദ്ധതിയുടെ ചിലവ് വഹിക്കുന്നതും സര്‍ക്കാര്‍ തന്നെയാണ്.
പ്രതിവര്‍ഷം ഒരാള്‍ക്ക് 550 ദിനാര്‍ തോതിലാണ് പദ്ധതിക്ക് ചിലവ് പ്രതീക്ഷിക്കുന്നത്. ഇത് ഒരിക്കലും പൊതു ജനങ്ങളുടെ മേല്‍ കെട്ടിവെക്കില്ലെന്നും പദ്ധതിക്കാവശ്യമായ ഫണ്ട് പൊതുബജറ്റില്‍ നിന്നും ഹെല്‍ത്ത് ഇന്‍ഷൂറന്‍സിന്റെ ഫണ്ടിലേക്ക് മാറ്റി നല്‍കുമെന്നും സര്‍ക്കുലറില്‍ വിശദീകരിച്ചിട്ടുണ്ടെന്നും ഡോ. ഷെയ്ഖ് മുഹമ്മദ് ബിന്‍ അബ്ദുള്ള അല്‍ ഖലീഫ വ്യക്തമാക്കി.

ആരോഗ്യഇന്‍ഷൂറന്‍സ് പദ്ധതിയിലൂടെ ഭീമമായ ഒരു തുക ജനങ്ങള്‍ക്ക് നല്‍കേണ്ടി വരുമെന്നാണ് കഴിഞ്ഞ ദിവസം ചില പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തത്. സോഷ്യല്‍ മീഡിയകളും ചില ഓണ്‍ലൈന്‍ ന്യൂസ് പോര്‍ട്ടിലുകളും ഇവ ഏറ്റു പിടിക്കുകയും ചെയ്തു. ഇതേ തുടര്‍ന്നാണ് അധികൃതര്‍ വിശദീകരണവുമായി രംഗത്തെത്തിയത്. വാര്‍ത്തയിലുള്ളതു പോലെ ആരോഗ്യ ഇന്‍ഷൂറന്‍സ് ലഭിക്കാന്‍ പ്രത്യേക ആശുപത്രികളിലോ സ്ഥാപനങ്ങളിലോ പോകണമെന്ന് നിര്‍ബന്ധമില്ല, രോഗികള്‍ക്ക് ഏതു ആശുപത്രിയിലും ചികിത്സ തേടാമെന്നും അതിനുള്ള സ്വാതന്ത്രം രോഗികള്‍ക്കുണ്ടെന്നും അദ്ദേഹം കൂട്ടിചേര്‍ത്തു.