കഠിനംകുളം: ചെളിക്കുളമായി മാറിയ കണിയാപുരം കെ.എസ്.ആര്‍.സി ഡിപ്പോയ്ക്കടുത്തെ ഓട്ടോറിക്ഷ സ്റ്റാന്റ് യാത്രകാര്‍ക്ക് ദുരിതമായിരിക്കുകയാണ്.
ഡിപ്പോയ്ക്ക് പുറമെ ആലുംമൂട്, എല്‍.പി സ്‌കൂള്‍, ബി.ആര്‍.സി സെന്റര്‍ തുടങ്ങിയവയെല്ലാം ചെളിക്കുഴിക്കടുത്താണ് സ്ഥിതി ചെയ്യുന്നത്. സ്‌കൂള്‍ തുറക്കുന്നതോടെ വിദ്യാര്‍ഥികള്‍ക്ക് സൂളിലേക്ക് കടന്ന് പോകാന്‍ കഴിയാത്ത അവസ്ഥയിലാണ്.
കൂടാതെ ദിവസവും നൂറുകണക്കിന് യാത്രകാര്‍ ഈ ചെളിക്കുഴി താണ്ടിവേണം ഡിപ്പോയിലെത്താന്‍. ചിലയിടങ്ങളില്‍ ചെളിയില്‍ കുരുങ്ങി കാല്‍നടയാത്രക്കാര്‍ വീഴുന്നത് നിത്യസംഭവമാണ്. പ്രദേശം ചെളി അഭിഷേകമായതോടെ സമീപത്തെ നിരവധി കച്ചവട സ്ഥാപനങ്ങള്‍ അടച്ചുപൂട്ടലിന്റെ വക്കിലാണ്.
കൂടാതെ ഈ ചെളി നിറഞ്ഞ് കിടക്കുന്നിടം നൂറ് കണക്കിന് ഓട്ടോറിക്ഷക്കാരുടെ ഉപജീവനമാര്‍ഗവും കൂടിയാണ്. ഇവരുടെ അവസ്ഥയും അവതാളത്തിലായിരിക്കുകയാണ്. അണ്ടൂര്‍ക്കോണം പഞ്ചായത്തില്‍പ്പെട്ട ഈ പ്രദേശത്ത് തന്നെ പഞ്ചായത്ത് ഓഫിസും സ്ഥിതി ചെയ്യുന്നത്.
ഇതൊന്നും ഇവിടെ എത്തുന്ന ജനപ്രതിനിധികളുടെ കണ്ണില്‍ പെട്ടുന്നില്ലെന്ന് നാട്ടുകാര്‍ പരാതിപ്പെടുന്നു.