തിരുവനന്തപുരം: കോട്ടയത്ത് ദുരഭിമാനക്കൊലക്ക് ഇരയായ കെവിന്റെ പോസ്റ്റ്‌മോര്‍ട്ടം റിപ്പോര്‍ട്ടില്‍ വസ്തുതകള്‍ വെളിച്ചത്തുവരാതിരിക്കാന്‍ സര്‍ക്കാര്‍ ഇടപെടലുണ്ടായെന്ന് സംശയമുണ്ടെന്ന് കൊടിക്കുന്നില്‍ സുരേഷ് എം.പി. കെവിന്റെ ബന്ധുക്കളും നാട്ടുകാരും സംശയം ഉന്നയിച്ചിട്ടുണ്ട്.
മുങ്ങിമരണത്തിന് സാധ്യതയുള്ള വിധം ആഴമുള്ള ഭാഗത്തല്ല മൃതദേഹം കണ്ടെത്തിയത്. പ്രതികളായ ഡി.വൈ.എഫ്.ഐ പ്രവര്‍ത്തകരെ സംരക്ഷിക്കും വിധം റിപ്പോര്‍ട്ടില്‍ വെള്ളംചേര്‍ത്തുവെന്നും കൊടിക്കുന്നില്‍ സുരേഷ് വാര്‍ത്താസമ്മേളനത്തില്‍ ആരോപിച്ചു. കെവിന്റെ മരണത്തോടുള്ള പിന്നോക്കക്ഷേമ വകുപ്പ് മന്ത്രി എ.കെ ബാലന്റെ പ്രതികരണം പട്ടികജാതി വിഭാഗങ്ങളെ ആക്ഷേപിക്കുന്നതാണ്. ഇതോടെ എ.കെ ബാലന് മന്ത്രി പദവിയിലിരിക്കാനും ആ വകുപ്പ് കൈകാര്യം ചെയ്യാനും യോഗ്യതയില്ലെന്ന് വ്യക്തമായി. കെവിന്റെ വീട് സന്ദര്‍ശിക്കാനോ, സംസ്‌കാര ചടങ്ങില്‍ പങ്കെടുക്കാനോ ഒരു മന്ത്രി പോലും തയാറായില്ല.
ദലിത് വിഭാഗങ്ങളോടുള്ള സി.പി.എമ്മിന്റെയും സംസ്ഥാന സര്‍ക്കാരിന്റെയും സമീപനമാണ് ഇതിലൂടെ വ്യക്തമാകുന്നത്. പിണറായി സര്‍ക്കാര്‍ അധികാരത്തില്‍ വന്നതിനു ശേഷം കേരളത്തിലെ ദലിതര്‍ക്ക് ജീവിക്കാന്‍ കഴിയാത്ത സ്ഥിതിയാണ്. ഒരു ഭാഗത്ത് സി.പി.എമ്മും മറുഭാഗത്ത് പൊലിസും ദലിതരെ വേട്ടയാടുകയാണ്.ഉത്തരേന്ത്യയില്‍ ബി.ജെ.പിയും ആര്‍.എസ്.എസും ചെയ്യുന്ന അക്രമ പ്രവര്‍ത്തനങ്ങളാണ് കേരളത്തില്‍ സി.പി.എം ചെയ്യുന്നത്. ഡി.ജി.പിയായി ലോക്‌നാഥ് ബഹ്‌റ തുടരുന്നിടത്തോളം ദലിതര്‍ക്കു നീതി ലഭിക്കുമെന്ന് പ്രതീക്ഷയില്ല. യഥാര്‍ത്ഥ പ്രതികളെ കിട്ടാതാകുന്ന കേസുകളില്‍ അതാത് പ്രദേശങ്ങളിലെ ദലിത് യുവാക്കളെ പ്രതികളാക്കുകയാണെന്നും കൊടിക്കുന്നില്‍ ആരോപിച്ചു.
കേസിലെ പെണ്‍കുട്ടിയുടെ ബന്ധുക്കള്‍ക്കൊന്നും കോണ്‍ഗ്രസ് ബന്ധമില്ല. പിതാവ് പ്രാദേശിക സി.പി.എം പ്രവര്‍ത്തകനാണ്. സംഭവത്തിന്റെ ഉത്തരവാദിത്തം കോണ്‍ഗ്രസിനു മേല്‍ കെട്ടിവെയ്ക്കാനുള്ള ശ്രമം വിലപ്പോവില്ല. കെവിന്റെ കുടുംബത്തിന്റെ പൂര്‍ണ സംരക്ഷണം സര്‍ക്കാര്‍ ഏറ്റെടുക്കണമെന്ന് കൊടിക്കുന്നില്‍ ആവശ്യപ്പെട്ടു.
ഉത്തരേന്ത്യയിലേതിന് സമാനമായി സംസ്ഥാനത്തെ ദലിത് വിഭാഗങ്ങളും പ്രക്ഷോഭത്തിനൊരുങ്ങുകയാണെന്നും പിണറായി സര്‍ക്കാര്‍ അധികാരത്തില്‍ നിന്ന് പുറത്താകുന്നത് വരെ പ്രക്ഷോഭം തുടരുമെന്നും കൊടിക്കുന്നില്‍ പറഞ്ഞു.