മൂവാറ്റുപുഴ: പറവൂര്‍ ഗാന്ധിഗ്രാമ സേവാ കേന്ദ്രത്തിലെ അഴിമതിയെക്കുറിച്ച് അന്വേഷിക്കാന്‍ മൂവാറ്റുപുഴ വിജിലന്‍സ് കോടതി ജഡ്ജി പി.മാധവന്റെ ഉത്തരവ്. എട്ട് കോടി രൂപയുടെ അഴിമതി ഗാന്ധി സ്മാരക കേന്ദ്രത്തില്‍ നടന്നിട്ടുള്ളതായി കാണിച്ച് മുന്‍ പ്രസിഡന്റും സെക്രട്ടറിയുമായിരുന്ന പി.കെ ശ്രീധരന്‍ നായര്‍ നല്‍കിയ ഹരജിയെ തുടര്‍ന്നാണ് നടപടി.
എറണാകുളം വിജിലന്‍സ് ആന്റ് ആന്റി കറപ്ഷന്‍ ബ്യൂറോ ഡിവൈ.എസ്.പി.യോട് അന്വേഷിച്ച് ഏപ്രില്‍ 28ന് മുമ്പ് റിപ്പോര്‍ട്ട് നല്‍കാനാണ് വിജിലന്‍സ് കോടതിയുടെ ഉത്തരവ്.
തിരുവനന്തപുരം ഖാദി ആന്റ് വില്ലേജ് ഇന്‍ഡസ്ട്രീസ് ബോര്‍ഡ് സെക്രറി വി.ജയകമാരന്‍ പിള്ള, എറണാകുളം ജില്ലാ ഖാദിഗ്രാമ വ്യവസായ പ്രോജക്ട് ഓഫീസര്‍മാരായ കെ.കെ.ദയാനന്ദന്‍, കെ.കെ.ചാന്ദ്‌നി , ഗ്രാമസേവാകേന്ദ്രം പ്രസിഡന്റ് ടി.ബി.ശിവകുമാര്‍ , സെക്രട്ടറി കെ.കെ.ബാലകൃഷ്ണന്‍ തുടങ്ങി 20 പേര്‍ക്കെതിരെയാണ് അന്വേഷണം.
ഖാദി ഗ്രാമ വ്യവസായ കമ്മിഷനും ഖാദി ആന്റ് വില്ലേജ് ഇന്‍ഡസ്ട്രീസ് ബോര്‍ഡിനും സെയില്‍ ടാക്‌സ് വക കണക്കിലും ജില്ലാ രജിസ്ട്രാര്‍ക്ക് നല്‍കിയ ഓഡിറ്റഡ് കണക്കിലും വ്യാപകമായ കൃത്രിമങ്ങള്‍ നടന്നതായി പരാതിക്കാരന്റെ ഹരജിയില്‍ പറയുന്നു.