മണ്ണാര്‍ക്കാട്: അട്ടപ്പാടിയിലെ ആദിവാസി യുവാവ് കടുകമണ്ണ ഊരിലെ മല്ലന്റെ മകന്‍ മധു (35)വിന്റെ ആള്‍ക്കൂട്ട കൊലപാതക കേസിലെ 16 പ്രതികള്‍ക്കും ഹൈക്കോടതി ജാമ്യം അനുവദിച്ചു. ഓരോ പ്രതികള്‍ക്കും ഓരോ ലക്ഷം രൂപയുടെ ബോണ്ടിലാണ് ജാമ്യം.
ജാമ്യം കിട്ടിയ പ്രതികളാരും മണ്ണാര്‍ക്കാട് താലൂക്കില്‍ പ്രവേശിക്കരുതെന്നും, സാക്ഷികളെ സ്വാധീനിക്കുകയൊ, തെളിവ് നശിപ്പിക്കുകയൊ ചെയ്യരുതെന്ന ഉപാധികൂടിയുണ്ട്. കൂടാതെ പാസ്‌പോര്‍ട്ട് സറണ്ടര്‍ ചെയ്യുകയും വേണമെന്ന നിബന്ധനകളിലാണ് പ്രതികള്‍ക്ക് കോടതി ജാമ്യം അനുവദിച്ചിരിക്കുന്നത്. ഈ മാസം 22നാണ് കേസുമായി ബന്ധപ്പെട്ട കുറ്റപ്പത്രം അഗളി പൊലീസ് മണ്ണാര്‍ക്കാട് എസ്.സി, എസ്.ടി സ്‌പെഷല്‍ കോടതിയില്‍ സമര്‍പ്പിച്ചത്.
പാക്കുളം മേച്ചേരി ഹുസൈന്‍ (50), മുക്കാലി കിളയില്‍ മരക്കാര്‍ (33),മുക്കാലി പൊതുവച്ചോല ശംസുദ്ധീന്‍(34),കല്‍കണ്ടി കുന്നത്ത് അനീഷ്(30),മുക്കാലി താഴ്‌ശ്ശേരി രാധാകൃഷ്ണന്‍ (34),ആനമൂളി പൊതുവച്ചോല അബൂബക്കര്‍ എന്ന ബക്കര്‍ (31), മുക്കാലി പടിഞ്ഞാറേപള്ള കുരിക്കള്‍ സിദ്ദീഖ് (38), മുക്കാലി തൊട്ടിയില്‍ ഉബൈദ്(25), മുക്കാലി വിരുത്തിയില്‍ നജീബ്(33), മുക്കാലി മണ്ണമ്പറ്റ ജയ്ജുമോന്‍(44), മുക്കാലി ചോലയില്‍ അബ്ദുല്‍കരീം(48), മുക്കാലി പുത്തന്‍പുരക്കല്‍ സജീവ്(30),മുക്കാലി മുരിക്കട സതീഷ്(39),മുക്കാലി ചെരിവില്‍ ഹരീഷ്(34),ബിജു(41), മുക്കാലി വിരുത്തിയില്‍ മുനീര്‍(28) എന്നിവരാണ് കേസിലെ പ്രതികള്‍. ഫെബ്രുവരി 22നാണ് കേസിനാസ്പദമായ സംഭവം നടന്നത്.