പാലക്കാട്: 2018-19 അധ്യയന വര്‍ഷത്തെ സ്‌കൂള്‍ പ്രവേശനോത്സവത്തിന്റെ ജില്ലാതല ഉദ്ഘാടനം ജൂണ്‍ ഒന്നിന് കോങ്ങാട് ഗവ.യു.പി സ്‌കൂളില്‍ കെ.വി. വിജയദാസ് എം.എല്‍.എ ഉദ്ഘാടനം ചെയ്യും. ജില്ലാ പഞ്ചായത്ത് വൈസ് പ്രസിഡന്റ് ടി.കെ.നാരായണദാസ് അധ്യക്ഷനാവുന്ന പരിപാടിയില്‍ ജില്ലാ പഞ്ചായത്ത് ആരോഗ്യ - വിദ്യാഭ്യാസ സ്റ്റാഡിങ് കമ്മിറ്റി ചെയര്‍പേഴ്‌സണ്‍ കെ.ബിനുമോള്‍, ജില്ലാ- ബ്ലോക്ക്- ഗ്രാമപഞ്ചായത്ത് ജനപ്രതിനിധികളും, വിദ്യാഭ്യാസ വകുപ്പ് ഉദ്യോഗസ്ഥരും, അധ്യാപക സംഘടനാ നേതാക്കന്‍മാരും പങ്കെടുക്കും. അന്ന് സംസ്ഥാനത്തെ മുഴുവന്‍ വിദ്യാലയങ്ങളിലും പ്രവേശനോത്സവത്തെ തുടര്‍ന്ന് വിദ്യാലയങ്ങളില്‍ എത്തുന്ന രക്ഷിതാക്കള്‍, എസ്.എം.സി , എം.എം.ഡി.സി , പി.ടി.എ , എം.പി.ടി.എ അംഗങ്ങള്‍ എന്നിവര്‍ക്ക് പൊതുവിദ്യാഭ്യാസ സംരക്ഷണയജ്ഞത്തിന്റെ ഭാഗമായി ബോധവത്കരണ ക്ലാസും നടക്കും. അഗളി, ആലത്തൂര്‍, ചെറുപ്പുള്ളശേരി, ചിറ്റൂര്‍, കൊല്ലങ്ങോട്, കുഴല്‍മന്ദം, മണ്ണാര്‍ക്കാട്, ഒറ്റപ്പാലം, പാലക്കാട്, പറളി, പട്ടാമ്പി, ഷൊര്‍ണ്ണൂര്‍, തൃത്താല ബ്ലോക്ക് റിസോഴ്‌സ് സെന്ററുകളില്‍ നടക്കുന്ന പ്രവേശനോത്സവം ജനപ്രതിനിധികള്‍ ഉദ്ഘാടനം ചെയ്യും.